മലപ്പുറം: പുതിയ പാര്ട്ടി രൂപീകരിക്കുമെന്ന് പ്രഖ്യാപിച്ച് നിലമ്പൂര് എംഎല്എ പി വി അന്വര്. തന്റെ ഇപ്പോഴത്തെ പോരാട്ടം രാഷ്ട്രീയ പാര്ട്ടിയായി മാറും. പഞ്ചായത്ത് തിരഞ്ഞെടുപ്പില് മത്സരിക്കുമെന്നും അന്വര് വാര്ത്താ സമ്മേളനത്തില് പറഞ്ഞു. കേരളത്തിലെ എല്ലാ പഞ്ചായത്തുകളിലും മത്സരിക്കുമെന്നും യുവാക്കളുടെ പിന്തുണ ലഭിക്കുമെന്നും പരിപൂര്ണ്ണ മതേതര സ്വഭാവവുമുള്ള പാര്ട്ടി ആയിരിക്കും രൂപീകരിക്കുകയെന്നും അന്വര് വ്യക്തമാക്കി.
രാഷ്ട്രീയ പാര്ട്ടി അല്ലാതെ സാമൂഹ്യ സംഘനകള് കൊണ്ട് കാര്യമില്ല. ഒരു ഹിന്ദു പാര്ട്ടി വിട്ടാല് അവനെ സംഘി ആക്കും, ഒരു മുസ്ലിം പാര്ട്ടി വിട്ടാല് അവനെ സുഡാപ്പിയാക്കുമെന്നും സിപിഐഎമ്മിനെതിരെ അന്വര് പറഞ്ഞു. ആരും ഇല്ലെങ്കിലും ഒറ്റയ്ക്ക് ആണേലും കാര്യം പറയും. അടുത്തതായി വന്യമൃഗ ശല്യ വിഷയം ഏറ്റെടുക്കും. വനം വകുപ്പിന് കീഴില് വലിയ ഗൂഡാലോചനയാണ് നടക്കുന്നത്. പലതും തുറന്ന് പറയും. തന്നെ പുറത്താക്കിയത് തന്റെ വിഷയം പറഞ്ഞിട്ടില്ല, ജനങ്ങളുടെ വിഷയം പറഞ്ഞിട്ടാണെന്നും പി വി അന്വര് ആരോപിച്ചു. ദ ഹിന്ദുവിലെ വിവാദ അഭിമുഖം ഗൂഢാലോചനയാണെന്നാണ് അന്വര് ആരോപിക്കുന്നത്.
