കണ്ണൂര്: എഡിഎം നവീന് ബാബുവിന്റെ ആത്മഹത്യയുമായി ബന്ധപ്പെട്ട കേസില് കണ്ണൂര് മുന് ജില്ലാ പഞ്ചായത്ത് പ്രസിഡന്റ് പി പി ദിവ്യയെ പോലീസ് കസ്റ്റഡിയിലെടുത്തു.
ദിവ്യയെ കസ്റ്റഡിയിലെടുത്തതായി സിറ്റി പൊലീസ് കമ്മീഷണര് അജിത് കുമാര് അറിയിച്ചു. കോടതിയുടെ പരിഗണയിലിരുന്നതിനാലാണ് കസ്റ്റഡിയിലെടുക്കാതിരുന്നതെന്നും അദ്ദേഹം അറിയിച്ചു. ദിവ്യയെ ഉടന് കോടതിയില് ഹാജരാക്കുമെന്നും അദ്ദേഹം വ്യക്തമാക്കി
കോടതി ദിവ്യയുടെ മുന്കൂര് ജാമ്യാപേക്ഷ തള്ളിയ പശ്ചാത്തലത്തില് അറസ്റ്റ് ഉടനുണ്ടായേക്കുമെന്ന ഘട്ടത്തിലാണ് ദിവ്യയുടെ കീഴടങ്ങല്. നവീന്റെ മരണത്തിന് പിന്നാലെ ദിവ്യ ഒളിവിലായിരുന്നു.
ദിവ്യയെ അന്വേഷണസംഘം ചോദ്യം ചെയ്ത് വരികയാണ്. ദിവ്യ കീഴടങ്ങാനെത്തിയപ്പോള് അന്വേഷണ ഉദ്യോഗസ്ഥന് കസ്റ്റഡിയിലെടുക്കുകയായിരുന്നുവെന്ന് കമ്മിഷണര് വിശദീകരിച്ചു. കണ്ണപുരത്തുവച്ചാണ് ദിവ്യയെ കസ്റ്റഡിയിലെടുത്തത്. ദിവ്യയെ പ്രാഥമികമായി ചോദ്യം ചെയ്ത ശേഷം അറസ്റ്റ് ചെയ്ത് കോടതിയില് ഹാജരാക്കും. ദിവ്യ ഇന്ന് റെഗുലര് ജാമ്യാപേക്ഷ കൂടി സമര്പ്പിച്ചേക്കാനാണ് സാധ്യത.
