പത്തനംതിട്ട: പത്തനംതിട്ടയില് കായികതാരമായ പെണ്കുട്ടിയെ 60 ലധികം പേര് ലൈംഗിക പീഡനത്തിനു ഇരയാക്കിയെന്ന കേസില് കൂടുതല് അറസ്റ്റ് . 13 വയസ്സ് മുതല് ചൂഷണത്തിന് ഇരയായി എന്ന് പെണ്കുട്ടി പൊലീസിന് മൊഴി നല്കി. പോക്സോ വകുപ്പ് ഉള്പ്പെടെ ചുമത്തിയ കേസില് ഇന്നലെ അഞ്ച് പേരുടെ അറസ്റ്റ് ആണ് ഇലവുംതിട്ട പൊലീസ് രേഖപ്പെടുത്തിയത്. പത്തനംതിട്ട, കോന്നി തുടങ്ങി ജില്ലയിലെ മറ്റ് സ്റ്റേഷനുകളിലും എഫ്ഐആറുകള് രജിസ്റ്റര് ചെയ്തിട്ടുണ്ട്.
സിഡബ്ല്യുസിക്ക് ലഭിച്ച വിവരത്തെ തുടര്ന്നാണ് ജില്ലാ പൊലീസ് മേധാവി പ്രത്യേക സംഘം രൂപീകരിച്ച് കേസ് അന്വേഷിച്ചത്. ശാസ്ത്രീയമായ തെളിവുകള് കിട്ടുന്ന മുറയ്ക്ക് മറ്റുള്ളവരുടെയും അറസ്റ്റ് രേഖപ്പെടുത്തുമെന്ന് പൊലീസ് അറിയിച്ചു.
പെണ്കുട്ടിക്ക് ഇപ്പോള് 18 വയസ്സുണ്ട്. രണ്ട് കൊല്ലമായുള്ള പീഡനവിവരങ്ങളാണ് സിഡബ്ല്യുസി വഴി പൊലീസിന് ലഭിച്ചത്. കായിക താരമായ പെണ്കുട്ടിയെ ചൂഷണം ചെയ്തവരില് പരിശീലകരും കായിക താരങ്ങളും സഹപാഠികളും ഉള്പ്പെടുന്നുണ്ടെന്നാണ് പൊലീസിന് ലഭിച്ച വിവരം.
ലൈംഗിക ചൂഷണത്തിനെതിരേ ക്ലാസില് നല്കിയ കൗണ്സിലിങ്ങിനിടെയാണ് പെണ്കുട്ടി ദുരനുഭവം പങ്കുവെച്ചത്. തുടര്ന്ന് മഹിളാ സമാഖ്യ സൊസൈറ്റി വഴി സി.ഡബ്ല്യൂ.സിയില്
എത്തുകയായിരുന്നു. സൈക്കോളജിസ്റ്റിന്റെ സഹായത്തോടെ പെണ്കുട്ടിയുടെ വിശദമായ വിവരങ്ങളും പീഡനം സംബന്ധിച്ച വിവരങ്ങളും ശേഖരിക്കാനായിരുന്നു ആദ്യഘട്ട ശ്രമം. തുടര്ന്ന് സൈക്കോളജിസ്റ്റ് നല്കിയ റിപ്പോര്ട്ടിന്റെ അടിസ്ഥാനത്തിലാണ് കേസ് എടുക്കാന് സി.ഡബ്ല്യൂ.സി. പോലീസിന് നിര്ദേശം നല്കിയത്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
