തിരുവനന്തപുരം: വിതുര താലൂക്ക് ആശുപത്രിയില് ആംബുലന്സ് തടഞ്ഞതിനെ തുടര്ന്ന് രോഗി മരണമടഞ്ഞ സംഭവത്തില് കുറ്റക്കാര്ക്കെതിരെ കര്ശന നടപടി സ്വീകരിക്കുന്നതാണെന്ന് ആരോഗ്യ വകുപ്പ് മന്ത്രി വീണാ ജോര്ജ്. സംഭവം അത്യന്തം വേദനാജനകമാണ്. ഇത് ഒരിക്കലും സംഭവിക്കാന് പാടില്ലാത്തതായിരുന്നു.
തിരുവനന്തപുരം വിതുരയില് ആംബുലന്സ് തടഞ്ഞുള്ള കോണ്ഗ്രസ് പ്രവര്ത്തകരുടെ പ്രതിഷേധത്തെ തുടര്ന്ന് ചികിത്സ വൈകി രോഗി മരിച്ചു. വിതുര മണലി സ്വദേശി ബിനു ആണ് മരിച്ചത്. കുറച്ചു നേരത്തെ ആശുപത്രിയില് എത്തിച്ചിരുന്നെങ്കില് രക്ഷിക്കാമായിരുന്നു എന്ന് ബന്ധുക്കള് പറഞ്ഞു. ആംബുലന്സിന്റെ കാലപ്പഴക്കവും, ഇന്ഷുറന്സ് തീര്ന്നതും ആരോപിച്ചായിരുന്നു കോണ്ഗ്രസ് വിതുര മണ്ഡലം കമ്മിറ്റിയുടെ നേതൃത്വത്തിന്റെ പ്രതിഷേധം.
ആത്മഹത്യയ്ക്ക് ശ്രമിച്ച ബിനുവിനെ ഉച്ചയോടെ വിതുര താലൂക്ക് ആശുപത്രിയില് എത്തിച്ചെങ്കിലും പ്രാഥമിക ചികിത്സയ്ക്കുശേഷം മെഡിക്കല് കോളജിലേക്ക് കൊണ്ടുപോകാന് ശ്രമിക്കുമ്പോള് ആയിരുന്നു കോണ്ഗ്രസിന്റെ പ്രതിഷേധം. വിതുരയില് നിന്ന് ഡോക്ടര് എത്രയും വേഗം മെഡിക്കല് കോളജ് ആശുപത്രിയില് എത്തിക്കാന് നിര്ദ്ദേശിച്ചതിന്റെ അടിസ്ഥാനത്തിലാണ് ബിനുവുമായി ആംബുലന്സ് പുറപ്പെട്ടത്.
അതേസമയം, ആശുപത്രി അധികൃതര് പരാതി നല്കിയതിന്റെ അടിസ്ഥാനത്തില് വിതുര പൊലീസ് കേസ് രജിസ്റ്റര് ചെയ്തു.ബന്ധുക്കളും പരാതി നല്കുമെന്ന് അറിയിച്ചിട്ടുണ്ട്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
