തിരുവനന്തപുരം: പാറശ്ശാല ഷാരോണ് വധക്കേസില് ഇന്ന് കോടതി വിധി പറയും. 2022 ഒക്ടോബറിലാണ് കേസിനാസ്പദമായ സംഭവം നടന്നത്. കൊലപാതകം നടന്ന് രണ്ട് വര്ഷം കഴിയുമ്പോഴാണ് ഇന്ന് വിധി പറയുന്നത്. നെയ്യാറ്റിന്കര അഡീഷണല് സെഷന്സ് കോടതിയാണ് വിധി പറയുന്നത്.
വര്ഷങ്ങളായി പ്രണയത്തിലായിരുന്നു ഷാരോണും ഗ്രീഷ്മയും എന്നാല് ഇതിനിടെ ഗ്രീഷ്മയ്ക്ക് മറ്റൊരു വിവാഹാലോചന വരികയും ഇത് ഉറപ്പിക്കുകയും ചെയ്തു. ഇതോടെ ഷാരോണിനെ ഒഴിവാക്കാന് ഗ്രീഷ്മയും കുടുംബവും പ്ലാന് തയ്യാറാക്കുകയായിരുന്നു. തുടര്ന്ന് ഷാരോണിനെ വീട്ടിലേക്ക് വിളിച്ചുവരുത്തുകയും വിഷം ചേര്ത്ത കഷായം നല്കുകയുമായിരുന്നു. കഷായം കഴിച്ച ശേഷം വീട്ടിലെത്തിയ ഷാരോണ് അവശനിലയിലായി. തുടര്ന്ന് വീട്ടുകാര് ഷാരോണിനെ ആശുപത്രിയില് പ്രവേശിപ്പിക്കുകയായിരുന്നു. പതിനൊന്ന് ദിവസം ചികിത്സയില് കഴിഞ്ഞ ശേഷമാണ് ഷാരോണ് മരിച്ചത്.
മജിസ്ട്രേറ്റിന് മുന്നില് മരണമൊഴി നല്കുന്നതിനിടെ ഗ്രീഷ്മ നല്കിയ കഷായം കുടിച്ചിരുന്നതായി ഷാരോണ് പറഞ്ഞിരുന്നു. എന്നാല് ഗ്രീഷ്മ തന്നെ അപായപ്പെടുത്തുമെന്ന് കരുതുന്നില്ലെന്നും ഷാരോണ് മൊഴി നല്കി. ഇതാണ് കേസില് അന്വേഷണ സംഘത്തിന് തുമ്പായത്. ഷാരോണിന്റെ മരണശേഷം നിയോഗിച്ച പ്രത്യേക സംഘത്തിന് ഫോറന്സിക് ഡോക്ടര് കൈമാറിയ ശാസത്രീയ തെളിവുകളും കേസില് നിര്ണായകമായി. പൊലീസ് വിളിച്ചു വരുത്തി ചോദ്യം ചെയ്തപ്പോള് ഗ്രീഷ്മ കുറ്റം സമ്മതിച്ചിരുന്നു. തെളിവുകള് നശിപ്പിച്ചതിന് ഗ്രീഷ്മയുടെ അമ്മ സിന്ധു, അമ്മാവന് നിര്മലകുമാരന് നായരെയും കേസില് പ്രതി ചേര്ത്തിരുന്നു.
