മാനന്തവാടി: വയനാട്ടില് കോണ്ഗ്രസ് നേതാവ് രാഹുല് ഗാന്ധിയുടെ നേതൃത്വത്തില് നടന്ന റോഡ് ഷോയില് മുസ്ലിം ലീഗ് പതാകയ്ക്ക് വിലക്കെന്ന് ആരോപണം. മാനന്തവാടിയില് നടന്ന റോഡ് ഷോയിലാണ് ലീഗ് പതാകയ്ക്ക് വിലക്കേര്പ്പെടുത്തിയത്.
കോണ്ഗ്രസും ആര്.എസ്.എസും തമ്മിലുള്ള ധാരണപ്രകാരമാണ് ലീഗിന്റെ കൊടി അഴിച്ചുമാറ്റിയതെന്ന് സി.പി.ഐ.എം വിമര്ശിച്ചു. കെ.സി വേണുഗോപാല് ഇടപെട്ടാണ് കെട്ടിയ പതാകകളെല്ലാം അഴിച്ചു മാറ്റിയത് എന്ന് സി.പി.ഐ.എം ജില്ലാ സെക്രട്ടറിയേറ്റ് അംഗം എ.എന് പ്രഭാകരന് പറഞ്ഞു.
‘ആര്.എസ്.എസിന്റെ വോട്ട് ജയലക്ഷ്മിയ്ക്ക് ലഭിക്കണമെങ്കില് മുസ്ലിം ലീഗിന്റെ പതാക ഒഴിവാക്കണമെന്ന് ആര്.എസ്.എസ് പക്ഷത്തു നിന്നുണ്ടായ സമ്മര്ദത്തെ തുടര്ന്നാണ് കെ.സി വേണുഗോപാല് ഇടപെട്ട് കെട്ടിയ കൊടിയെല്ലാം അഴിപ്പിച്ചത്. എന്നിട്ട് അതെല്ലാം ഒരു ജീപ്പിനകത്ത് കൂട്ടിയിട്ട് ലീഗുകാര്ക്ക് കൊണ്ടു പോകേണ്ട ഗതികേടുണ്ടായി. യൂത്ത് ലീഗ് പ്രവര്ത്തകന് വലിയൊരു കൊടി കൊണ്ടുവന്നിട്ട് അതു ചുരുട്ടി വടിയാക്കി മാറ്റി, വടിയും പിടിച്ച് സ്കൂട്ടിയിലിരിക്കുന്ന ദയനീയമായ കാഴ്ചയും കണ്ടു. ആത്മാഭിമാനമുള്ള ലീഗുകാര് ഇതില് പ്രതിഷേധിച്ച് പ്രതികാരം ചെയ്യണമെന്നാണ് ഞങ്ങളുടെ അഭിപ്രായം’, എ.എന് പ്രഭാകരന് പറഞ്ഞു.
