ലെഫ്. ജനറല് അനില് ചൗഹാന് സംയുക്ത സൈനിക മേധാവിയായി ചുമതലയേറ്റു. ദില്ലിയിലെ പ്രതിരോധ മന്ത്രാലയത്തില് നടന്ന ചടങ്ങിലാണ് ലെഫ്. ജനറല് അനില് ചൗഹാന് ചുമതല ഏറ്റെടുത്തത്. ദേശീയ യുദ്ധ സ്മാരകത്തില് പുഷ്പചക്രം അര്പ്പിച്ച ശേഷമാണ് ജനറല് ചൗഹാന് ചുമതലയേറ്റത്. കഴിഞ്ഞ ബുധനാഴ്ചയാണ് അദ്ദേഹത്തെ സംയുക്ത സൈനിക മേധാവിയായി നിയമിച്ചത്. പ്രഥമ സിഡിഎസ് ആയിരുന്ന ജനറല് ബിപിന് റാവത്ത് മരിച്ച് 9 മാസങ്ങള്ക്ക് ശേഷമാണ് ആ സ്ഥാനത്തേക്ക് ലെഫ്. ജനറല് അനില് ചൗഹാനെ നിയമിക്കുന്നത്.
സിഡിഎസിനൊപ്പം സൈനിക കാര്യ സെക്രട്ടറി പദവിയും ലഫ്. ജനറല് അനില് ചൗഹാന് വഹിക്കും. ലഫ്. ജനറല് പദവിയില് വിരമിച്ചവരെയും സംയുക്ത സൈനിക മേധാവിയായി നിയമിക്കാമെന്ന് കേന്ദ്രം ജൂണില് ഉത്തരവിറക്കിയിരുന്നു. ഇതുപ്രകാരമാണ് വിരമിച്ച ശേഷം ലഫ്. ജനറല് അനില് ചൗഹാന്, സിഡിഎസ് ആയി നിയമിതനാകുന്നത്. കിഴക്കന് സൈനിക കമാന്ഡ് മേധാവിയായിരിക്കെ 2021 മെയിലാണ് ലഫ്. ജനറല് അനില് ചൗഹാന് സൈന്യത്തില് നിന്ന് വിരമിച്ചത്.
നാല്പത് വര്ഷത്തോളം നീണ്ട സൈനിക സേവനത്തിനിടെ ജമ്മു കശ്മീരിലും വടക്കുകിഴക്കന് സംസ്ഥാനങ്ങളിലും നിര്ണായക മേഖലകളില് പ്രവര്ത്തിച്ചിട്ടുണ്ട്. 1981ലാണ് ഉദ്യോഗസ്ഥനായി സൈന്യത്തില് ചേര്ന്നത്. മിലിട്ടറി ഓപ്പറേഷന് ഡയറക്ടര് ജനറല് സ്ഥാനമടക്കമുള്ള നിര്ണായക പദവികളും വഹിച്ചിട്ടുണ്ട്.
2021 ഡിസംബറിലാണ് ഊട്ടിയില് ഒരു ചടങ്ങില് പങ്കെടുക്കാന് പോകുന്നതിനിടെ രാജ്യത്തെ പ്രഥമ സിഡിഎസ് ആയിരുന്ന ജനറല് ബിപിന് റാവത്ത് ഹെലികോപ്റ്റര് അപകടത്തില് കൊല്ലപ്പെട്ടത്. അദ്ദേഹത്തിന്റെ ഭാര്യയും മറ്റ് 11 പേരും അപകടത്തില് മരിച്ചു.
