HIGHLIGHTS : KV Thomas to attend CPM party congress seminar
പാര്ട്ടിയുടെ വിലക്ക് ലംഘിച്ച് സിപിഎം പാര്ട്ടി കോണ്ഗ്രസിന്റെ ഭാഗമായുള്ള കണ്ണൂരില് നടക്കുന്ന ദേശീയ സെമിനാറില് പങ്കെടുക്കുമെന്ന് മുതിര്ന്ന കോണ്ഗ്രസ് നേതാവ് കെ.വി.തോമസ്. രാജ്യം കടുത്ത പ്രതിസന്ധിയിലൂടെ കടന്നു പോകുന്ന ഈ സമയത്ത് രാഷ്ട്രീയ ഭിന്നതകള് മാറ്റിവച്ച് ഒന്നിച്ചു പ്രവര്ത്തിക്കണമെന്നും സിപിഎം തന്നെ ക്ഷണിച്ചത് അവരുടെ പാര്ട്ടിയില് ചേരാനല്ലെന്നും എം.കെ.സ്റ്റാലിനൊപ്പം സെമിനാറില് പങ്കെടുക്കാന് ആണെന്നും കെ.വി.തോമസ് പറഞ്ഞു. ഇന്ന് അദ്ദേഹം വസതിയില് നടത്തിയ വാര്ത്താ സമ്മേളനത്തിലാണ് തീരുമാനം പ്രഖ്യാപിച്ചത്.
സെമിനാറില് പങ്കെടുക്കരുതെന്ന് ഹൈക്കമാന്ഡ് കെ.വി തോമസിനോട് ആവശ്യപ്പെട്ടിരുന്നു. എന്നാല് ഇത് ലംഘിച്ചാണ് പങ്കെടുക്കാനുള്ള തീരുമാനം. പാര്ട്ടി തീരുമാനം ലംഘിച്ചാല് പാര്ട്ടിക്ക് പുറത്തായിരിക്കും സ്ഥാനമെന്ന് കെ.പി.സി.സി അധ്യക്ഷന് കെ. സുധാകരനും അറിയിച്ചിരുന്നു.
ഞാന് എ.ഐ.സി.സി അംഗമാണ്. എന്നെ പുറത്താക്കാനുള്ള അധികാരം എ.ഐ.സി.സിക്ക് മാത്രമാണ്. പാര്ട്ടി വിടില്ലെന്നും കെ.വി തോമസ് അറിയിച്ചു. തിരുത്തേണ്ടത് കോണ്ഗ്രസാണ്. 2018 ന് ശേഷം എനിക്ക് രാഹുല് ഗാന്ധിയെ കാണാന് അനുവാദം കിട്ടിയില്ല. പ്രധാനമന്ത്രിയെ കണ്ടാല് എന്നെ ബിജെപിയായും യെച്ചൂരിയെ കണ്ടാല് സിപിഎമ്മായും ചിത്രീകരിക്കുന്ന അവസ്ഥയാണ് – പാര്ട്ടി നേതൃത്വത്തിനെതിരെ ആഞ്ഞടിച്ച് കെ.വി.തോമസ് പറഞ്ഞു.