അന്തരിച്ച ചലച്ചിത്രതാരം കവിയൂര് പൊന്നമ്മയുടെ സംസ്കാരം ഇന്ന് നടക്കും. മൃതദേഹം രാവിലെ ഒന്പത് മുതല് 12 മണിവരെ കളമശേരി ടൗണ്ഹാളില് പൊതുദര്ശനത്തിന് വെക്കും. മമ്മൂട്ടിയും മോഹന്ലാലും അടക്കമുള്ള സിനിമാ താരങ്ങള് ഇവിടെയെത്തി ആദരാഞ്ജലി അര്പ്പിക്കും. വൈകീട്ട് നാലുമണിക്ക് ആലുവ കരിമാല്ലൂരിലെ വീട്ടുവളപ്പിലാണ് സംസ്കാരം.
അര്ബുദം ബാധിച്ച് ഏറെനാളായി ചികിത്സയിലായിരുന്ന കവിയൂര് പൊന്നമ്മ ഇന്നലെ വൈകീട്ടാണ് മരിച്ചത്. കഴിഞ്ഞ മേയ് മാസത്തില് ആണ് പരിശോധനയില് കാന്സര് സ്ഥിരീകരിച്ചത്. ആദ്യ പരിശോധനയില് തന്നെ സ്റ്റേജ് 4 കാന്സര് ആണ് കണ്ടെത്തിയത്. സെപ്തംബര് 3 ന് തുടര് പരിശോധനകള്ക്കും ചികിത്സക്കുമായിട്ടാണ് ആശുപത്രിയില് പ്രവേശിപ്പിച്ചത്. രോഗം മൂര്ച്ചിച്ചതിനെ തുടര്ന്നായിരുന്നു മരണം സംഭവിച്ചത്.
14 വയസ് മുതല് 79 വയസ് വരെ നീളുന്ന അസാധ്യമായ കലാസപര്യയ്ക്കാണ് കവിയൂര് പൊന്നമ്മ വിട പറയുമ്പോള് തിരശീല വീഴുന്നത്. പതിനാലാമത്തെ വയസ്സില് അന്നത്തെ പ്രമുഖ നാടകക്കമ്പനിയായ പ്രതിഭ ആര്ട്ട്സിന്റെ നാടകങ്ങളില് ഗായികയായാണ് കലാരംഗത്തു വരുന്നത്. കെ പി എ സിയുടെ മൂലധനം എന്ന നാടകത്തിലൂടെ നാടകരംഗത്തെത്തി. ശ്രീരാമ പട്ടാഭിഷേകം എന്ന സിനിമയില് ആണ് ആദ്യമായി കാമറക്കു മുമ്പില് എത്തുന്നത്.
ആറ് പതിറ്റാണ്ടുകളായി മലയാള സിനിമയില് നിറഞ്ഞു നില്ക്കുന്ന അഭിനേത്രിയായിരുന്നു കവിയൂര് പൊന്നമ്മ. ഏറ്റവും കൂടുതല് സിനിമകളില് അഭിനയിച്ച ആര്ട്ടിസ്റ്റുകളില് ഒരാള് കൂടിയാണ്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
