അഹമ്മദാബാദ്:ടി20 ലോകകപ്പിൽ ഇന്ത്യയുടെ മുത്തം. ന്യൂസിലന്ഡിനെ 96 റണ്സിന് തോല്പ്പിച്ചാണ് ഇന്ത്യ മൂന്നാം തവണയും ലോകകിരീടം ഉയര്ത്തിയത്. അഹമ്മദാബാദ്, നരേന്ദ്ര മോദി സ്റ്റേഡിയത്തില് ടോസ് നഷ്ടപ്പെട്ട് ബാറ്റിംഗിനെത്തിയ ഇന്ത്യയെ സഞ്ജു സാംസണിന്റെ (46 പന്തില് 89) ഇന്നിംഗ്സാണ് കൂറ്റന് സ്കോറിലേക്ക് നയിച്ചത്. ഇഷാന് കിഷന് (25 പന്തില് 54), അഭിഷേക് ശര്മ (21 പന്തില് 52) എന്നിവര് നിര്ണായക പിന്തുണ നല്കി. മറുപടി ബാറ്റിംഗില് ന്യൂസിലന്ഡ് 19 ഓവറില് 159 റണ്സിന് എല്ലാവരും പുറത്തായി. നാല് വിക്കറ്റ് നേടിയ ജസ്പ്രിത് ബുംറയാണ് ന്യൂസിലഡിനെ തകര്ത്തത്. 26 പന്തില് 52 റണ്സ് നേടിയ ടിം സീഫെര്ട്ടാണ് ന്യൂസിലന്ഡിന്റെ ടോപ് സ്കോറര്.
തകര്പ്പന് തുടക്കമാണ് സഞ്ജു – അഭിഷേക് സഖ്യം ഇന്ത്യക്ക് നല്കിയത്. 98 റണ്സാണ് ഇരുവരും ഒന്നാം വിക്കറ്റില് ചേര്ത്തത്. ഫോമിലേക്ക് തിരിച്ചെത്തിയ അഭിഷേക് 21 പന്തില് 52 റണ്സ് നേടി. മൂന്ന് സിക്സും ആറ് ഫോറും നേടിയ അഭിഷേക് എട്ടാം ഓവറില് രചിന് രവീന്ദ്രയുടെ പന്തില് വിക്കറ്റ് കീപ്പര്ക്ക് ക്യാച്ച് നല്കി മടങ്ങി.
തുടര്ന്ന് ക്രീസില് ഒത്തുചേര്ന്ന കിഷന് – സഞ്ജു സഖ്യം 105 റണ്സ് കൂടി കൂട്ടിചേര്ത്തു. 15-ാം ഓവറിലാണ് കൂട്ടുകെട്ട് പൊളിയുന്നത്. നീഷമിന്റെ ആദ്യ പന്തില് സഞ്ജു മടങ്ങി. ലോംഗ് ഓണില് കോള് മക്കോഞ്ഞിക്ക് ക്യാച്ച്. എട്ട് സിക്സും അഞ്ച് ഫോറും ഉള്പ്പെടുന്നതായിരുന്നു ഇന്നിംഗ്സ്.
2007, 2024 വർഷങ്ങളിലാണ് ഇന്ത്യ ഇതിന് മുൻപ് ടി20 ലോകകിരീടം സ്വന്തമാക്കിയത്. ഏകദിനത്തിലും ടി20യിലുമായി ഇന്ത്യയുടെ അഞ്ചാം ലോകകിരീടമാണിത്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
