ഇടുക്കി ചെറുതോണി ഡാമിന്റെ മൂന്ന് ഷട്ടറുകള് തുറന്നു. 35 സെന്റീമീറ്റര് വീതമാണ് ഷട്ടറുകള് ഉയര്ത്തിയിരിക്കുന്നത്. ഡാമിന്റെ രണ്ടും മൂന്നും നാലും ഷട്ടറുകള് ഘട്ടംഘട്ടമായി ഉയര്ത്തും. സെക്കന്റഡില് ഒരു ലക്ഷം ലിറ്റര് വെള്ളമാണ് പുറത്തേക്ക് ഒഴുക്കുക. മന്ത്രിമാരുടെ സാന്നിധ്യത്തില് മൂന്നാമത്തെ ഷട്ടറാണ് ആദ്യം തുറന്നത്.
ഷട്ടര് തുറന്ന സാഹചര്യത്തില് പെരിയാറിലെ ജലനിരപ്പ് ഒരു മീറ്റര് വരെ ഉയരാം. വൈകീട്ട് നാലുമണിയോടെ ആലുവ, കാലടി മേഖലയിലെത്തും എന്നാണ് റിപ്പോര്ട്ട്.
രാവിലെ 10.55 ഓടെയാണ് ആദ്യ മുന്നറിയിപ്പായ സൈറണ് മുഴങ്ങിയത്. മൂന്ന് മുന്നറിയിപ്പ് സൈറണുകള് മുഴങ്ങിയ ശേഷമാണ് ഷട്ടറുകള് തുറന്നത്. ഡാമിന്റെ ജലനിരപ്പ് 2397.96 അടിയായ സാഹചര്യത്തിലാണ് ഡാം തുറന്നിരിക്കുന്നത്. ചെറുതോണിയിലെ ജലനിരപ്പ് വിലയിരുത്തി അഞ്ചുമിനിറ്റിന് ശേഷമാണ് രണ്ടാമത്തെ ഷട്ടറുകള് തുറന്നത്.
ഇടുക്കി, വാത്തിക്കുടി,തങ്കമണി, കഞ്ഞിക്കുഴി മേഖലകളില് ജാഗ്രതാ നിര്ദേശം നല്കിയിട്ടുണ്ട്. ഡാം മേഖലയില് രാത്രിക്കാല യാത്ര വേണ്ടെന്നും പെരിയാറിന്റെ തീരത്തുള്ളവര് ജാഗ്രത പാലിക്കണമെന്നും മുന്നറിയിപ്പ് നല്കിയിട്ടുണ്ട്.
ഇടുക്കിയിലെ വെള്ളമൊഴുകുന്ന പ്രദേശങ്ങളിലെല്ലാം തന്നെ പൊതുജനങ്ങളും അധികാരികളും ജാഗ്രത പാലിക്കണമെന്നും ഇടുക്കി ജില്ലാ കലക്ടര് മുന്നറിയിപ്പ് നല്കിയിട്ടുണ്ട്.
