കൊച്ചി: കേരളത്തില് നരബലി നടന്നതായി കണ്ടെത്തല്. കൊച്ചിയില്നിന്നു സ്ത്രീകളെ തട്ടിക്കൊണ്ടുപോയി കൊലപ്പെടുത്തിയ കേസില് സീരിയല് കൊലപാതകി പിടിയില്. ദുര്മന്ത്രവാദത്തിന്റെ ഭാഗമായിട്ടാണു പ്രതി ക്രൂരകൃത്യം ചെയ്തതതതെന്നാണ് സൂചന.
ഐശ്വര്യവും സമ്പത്തും ലഭ്യമാകുമെന്ന് വിശ്വസിപ്പിച്ച് പെരുമ്പാവൂരിലെ ഏജന്റിന്റെ സഹായത്തോടെ സ്ത്രീകളെ തിരുവല്ലയിലെത്തിച്ച് ബലി നല്കിയെന്നാണ് വിവരം. കാലടിയില് നിന്നാണ് യുവതിയെ ആദ്യം കൊണ്ടുപോയത്. കടവന്ത്രയിലെ സ്ത്രീയെ കാണാതായ സംഭവത്തിലെ അന്വേഷണം തിരുവല്ലയിലേക്ക് നീങ്ങിയതോടെ കാലടിയില് നിന്നുള്ള മറ്റൊരു സ്ത്രീയും കൊല്ലപ്പെട്ടുവെന്ന് കണ്ടെത്തിയത്. രണ്ട് പേരുടെയും മൃതദേഹം കുഴിച്ചിട്ടിരിക്കുകയായിരുന്നു. ഇവരില് ഒരാളുടെ മൃതദേഹം കണ്ടെത്തിയെന്നാണ് വിവരം. കടവന്ത്ര സ്റ്റേഷന് പരിധിയില് പൊന്നുരുന്നി പഞ്ചവടി കോളനിയില്നിന്നു കാണാതായ പത്മം (52) കാലടി സ്വദേശിനി റോസിലി (50) എന്നിവരാണു കൊല്ലപ്പെട്ടത്. കൊല്ലപ്പെട്ട പത്മം ലോട്ടറി വില്പക്കാരിയായിരുന്ന ഇവര് ഇതര സംസ്ഥാനക്കാരിയാണെന്നും സെപ്റ്റംബര് 26ന് കാണാതായെന്നും നാട്ടുകാര് പറയുന്നു.
തിരുവല്ലയിലെ ദമ്പതികള്ക്ക് വേണ്ടിയാണ് പെരുമ്പാവൂരില് നിന്നുള്ള ഏജന്റ് കാലടിയില് നിന്നും കടവന്ത്രയില് നിന്നുമുള്ള സ്ത്രീകളെ കടത്തിക്കൊണ്ടുപോയത്. മൂന്ന് പേര് ഇപ്പോള് പൊലീസ് കസ്റ്റഡിയിലാണ്. സ്ത്രീകളെ കടത്തിക്കൊണ്ടുപോയ ഏജന്റും ദമ്പതികളുമാണ് പിടിയിലായിരിക്കുന്നത്. തിരുവല്ല സ്വദേശിയായ വൈദ്യന് ഭഗവത്, ഭാര്യ ലീല, പെരുമ്പാവൂര് സ്വദേശിയായ ഷിഹാബ് എന്ന റഷീദുമാണ് നരബലിയുമായി ബന്ധപ്പെട്ട് അറസ്റ്റിലായിരിക്കുന്നത്. പ്രതികളുടെ അറസ്റ്റ് രേഖപ്പെടുത്തി.
പെരുമ്പാവൂരിലെ ഏജന്റാണ് വൈദ്യരെയും ഭാര്യയെയും നരബലി നല്കിയാല് ഐശ്വര്യവും സമ്പത്തും ഉണ്ടാകുമെന്ന് വിശ്വസിപ്പിച്ചതെന്നാണ് വിവരം. ഇയാളാണ് സ്ത്രീകളുടെ വിശ്വാസ്യത നേടിയെടുത്ത ശേഷം ഇവരെ തിരുവല്ലയിലേക്ക് കൊണ്ടുപോയത്.
