HIGHLIGHTS : High Court directs Election Commission to inform Rajya Sabha polls
കൊച്ചി: രാജ്യസഭാ തെരഞ്ഞെടുപ്പ് മാറ്റിവെക്കാനുള്ള കാരണമറിയിക്കാന് കേന്ദ്ര തെരഞ്ഞെടുപ്പ് കമ്മീഷനോട് ഹൈക്കോടതി ആവശ്യപ്പെട്ടു. ഇക്കാര്യം രേഖാമൂലം അറിയക്കണം. രാജ്യസഭാ അംഗങ്ങളുടെ വിരമിക്കലിന് മുന്പ് തെരഞ്ഞെടുപ്പ് വിജ്ഞാപനം ഇറക്കുമെന്ന് തിരഞ്ഞെടുപ്പ് കമ്മീഷന് ഹൈക്കോടതിയില് പറഞ്ഞു.
കേരളത്തില് നിന്ന് ഒഴിവുള്ള മൂന്ന് രാജ്യസഭാ അംഗങ്ങളുടെ കാലാവധി ഏപ്രില് 21 -നാണ് അവസാനിക്കുന്നത്. ഇതിനുമുന്പ് തെരഞ്ഞെടുപ്പ് നടത്താനാണ് നേരത്തെ തീരുമാനിച്ചിരുന്നത്. എന്നാല് ഈ തീയതി പിന്നീട് പിന്വലിച്ചിരുന്നു. കേന്ദ്ര നിയമവകുപ്പിന്റെ ശുപാര്ശയുടെ അടിസ്ഥാനത്തിലാണ് ഇത് പിന്വലിച്ചത്. ഇതിനെതിരെയാണ് നിയമസഭാ സെക്രട്ടറിയും സിപിഎം നേതാവ് എസ് ശര്മ്മയും കേരള ഹൈക്കോടതിയെ സമീപിച്ചത്.
ഈ ഹര്ജിയിലാണ് തെരഞ്ഞെടുപ്പ് കമ്മീഷന്, തെരഞ്ഞെടുപ്പ് വിജ്ഞാപനം രാജ്യസഭാംഗങ്ങളുടെ കാലാവധി തീരുന്നതിന് മുന്പ് പുറപ്പെടുവിക്കുമെന്ന് അറിയിച്ചത്. തെരഞ്ഞെടുപ്പ് മുന്പ് തീരുമാനിച്ച തീയതിയില് നിന്ന് മാറ്റിവെച്ചതിന് കാരണമില്ലെന്നും വോട്ട് ചെയ്യാനുള്ള നിലവിലെ നിയമസഭാ അംഗങ്ങളുടെ അവസരം നഷ്ടപ്പെടുത്താനാണ് ശ്രമമെന്നും നിയമസഭാ സെക്രട്ടറി കോടതിയില് വാദിച്ചു. ഈ വാദം കേട്ട ശേഷമാണ് മുന്പ് തീരുമാനിച്ച തീയതി മാറ്റിയ കാരണം അറിയിക്കാന് തിരഞ്ഞെടുപ്പ് കമ്മീഷന് നിര്ദ്ദേശം നല്കിയത്. മറ്റന്നാള് കേസില് വിശദമായ വാദം കേള്ക്കും.