കണ്ണൂര്: കണ്ണൂരില് സിനിമ കാണുന്നതിനിടെ തിയേറ്ററിലെ വാട്ടര് ടാങ്ക് തകര്ന്ന് അപകടം. അപകടത്തില് സിനിമ കാണാനെത്തിയ നാല് പേര്ക്ക് പരിക്കേറ്റു. കണ്ണൂര് മട്ടന്നൂരിലെ സഹിന സിനിമാസിലെ വാട്ടര് ടാങ്കാണ് തകര്ന്നത്. വാട്ടര് ടാങ്ക് സ്ഥാപിച്ചിരുന്ന കെട്ടിടത്തിന്റെ ഒരു ഭാഗവും തകര്ന്നു. വാട്ടര് ടാങ്ക് പൊട്ടിയതോടെ മുകളില് നിന്ന് വെള്ളം തിയേറ്ററിലേക്ക് ഒഴുകിയെത്തി. വാട്ടര് ടാങ്കിനൊപ്പം കെട്ടിടത്തിലെ സിമന്റ് കട്ടകളും സീലിങും സീറ്റിലേക്ക് വീണാണ് സിനിമ കാണാനെത്തിയവര്ക്ക് പരിക്കേറ്റത്.
സംഭവത്തെ തുടര്ന്ന് സിനിമ പ്രദര്ശനം തടസപ്പെട്ടു. പരിക്കേറ്റവരെ ആശുപത്രിയിലെത്തിച്ചു. നായാട്ടുപാറ സ്വദേശി വിജില് (30), സുനിത്ത് നാരായണന് (36), കൂത്തുപറമ്പ് സ്വദേശികളായ ശരത്ത് (29) സുബിഷ (25) എന്നിവര്ക്കാണ് പരിക്കേറ്റത്. ലക്കി ഭാസ്കര് സിനിമയുടെ ഇന്റര്വെല് കഴിഞ്ഞ് വീണ്ടും സിനിമ ആരംഭിച്ചപ്പോഴാണ് സംഭവമെന്ന് തിയേറ്ററിലുണ്ടായിരുന്നവര് പറഞ്ഞു. ടാങ്കും സീലിങും സിമന്റ് കട്ടകളും വെള്ളവും സീറ്റുകളിലേക്ക് വീഴുകയായിരുന്നു. സീലിങിന് അടിയില് കുടുങ്ങിയ ഒരാള്ക്ക് ഉള്പ്പെടെയാണ് പരിക്കേറ്റതെന്നും സിനിമ കാണാനെത്തിയവര് പറഞ്ഞു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
