ന്യൂഡല്ഹി: രാജ്യത്തെ ആദ്യ വന്ദേ മെട്രോ ട്രെയിന് ഇന്ന് പ്രധാനമന്ത്രി നരേന്ദ്ര മോദി ഫ്ളാഗ് ഓഫ് ചെയ്യും. ഗുജറാത്തിലെ അഹമ്മദാബാദ്-ഭുജ് പാതയിലാണ് രാജ്യത്തെ ആദ്യ വന്ദേ മെട്രോ ട്രെയിന് എത്തുക.
ബുധനാഴ്ച മുതലാകും വന്ദേ മെട്രോയുടെ സാധാരണ സര്വീസ് ആരംഭിക്കുക. 455 രൂപയാണ് അഹമ്മദാബാദിനും ഭുജിനും ഇടയിലുള്ള ടിക്കറ്റ് നിരക്ക്.അഹമ്മദാബാദ്-ഭുജ് വന്ദേ മെട്രോ സര്വീസ് ഒമ്പത് സ്റ്റേഷനുകളില് നിര്ത്തി 360 കിലോമീറ്റര് ദൂരം 5 മണിക്കൂറും 45 മിനിറ്റും കൊണ്ട് എത്തിച്ചേരും. മണിക്കൂറില് 110 കിലോമീറ്റര് വേഗതയില് ട്രെയിന് സഞ്ചരിക്കുമെന്ന് പശ്ചിമ റെയില്വേ ഉദ്യോഗസ്ഥര് അറിയിച്ചു.
ഭുജില്നിന്ന് പുലര്ച്ചെ 5.05ന് പുറപ്പെടുന്ന ട്രെയിന് രാവിലെ 10.50ന് അഹമ്മദാബാദിലെത്തും. തിരിച്ച് അഹമ്മദാബാദില് നിന്ന് വൈകീട്ട് 5.30 ന് പുറപ്പെടുന്ന ട്രെയിന് രാത്രി 11.10ന് ഭുജിലെത്തും. ആഴ്ചയില് ആറ് ദിവസമായിരിക്കും സര്വീസ്. അത്യാധുനിക സൗകര്യങ്ങളുള്ള പൂര്ണ്ണമായും ശീതീകരിച്ച ട്രെയിനാണിത്.
അത്യാധുനിക സുരക്ഷാ സംവിധാനങ്ങളും ഇതിലുണ്ട്. 1,150 യാത്രക്കാര്ക്ക് ഇരിക്കാവുന്ന 12 കോച്ചുകള് ഉള്ക്കൊള്ളുന്ന വന്ദേ മെട്രോയില് റിസര്വേഷന്റെ ആവശ്യമില്ല. മിനിമം 30 രൂപയാണ് ടിക്കറ്റ് നിരക്ക്. 20 കോച്ചുകളുള്ള ആദ്യ വന്ദേ ഭാരത് ട്രെയിന് വാരാണസി-ഡല്ഹി പാതയില് ഉടന് സര്വീസ് ആരംഭിക്കുമെന്ന് പ്രധാനമന്ത്രിയുടെ ഓഫീസ് അറിയിച്ചു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
