മലപ്പുറം: സ്നേഹത്തിന്റെയും ഐക്യത്തിന്റെയും നന്മയുടെയും സന്ദേശവുമായി പ്രവാചകന് മുഹമ്മദ് നബിയുടെ ജന്മദിനമായ റബീഉല് അവ്വല് 12ന്റെ സ്മരണയില് വിശ്വാസികള് ഇന്ന് നബിദിനം ആഘോഷിക്കുന്നു. സംസ്ഥാനത്തുടനീളം വിവിധ പരിപാടികളാണ് നബിദിനത്തിന്റെ ഭാഗമായി സംഘടിപ്പിക്കുന്നത്. വിശ്വാസികള്ക്ക് അളവറ്റ ആവേശവും സന്തോഷവും നല്കുന്ന പ്രവാചക പ്രേമത്തിന്റെ ഇശലുകള് നാടാകെ പരന്നൊഴുകുന്ന പുണ്യ ദിനം.
റബീഉല് അവ്വല് ഒന്ന് മുതല് തന്നെ മിക്ക പള്ളികളിലും വിപുലമായ മൗലിദ് സദസ്സുകള് സംഘടിപ്പിച്ചിട്ടുണ്ട്. സമാധാനത്തിന്റെ ദൂതനായി കടന്നുവന്ന മുഹമ്മദ് നബിയുടെ സന്ദേശങ്ങള് പരമാവധി ജീവിതത്തില് പകര്ത്താനുള്ള പ്രതിജ്ഞയെടുത്താണ് വിശ്വാസികള് നബിദിനം ആഘോഷിക്കുന്നത്.
കൊടി തോരണങ്ങളാല് പള്ളികളും മദ്രസകളും അലങ്കരിച്ചിട്ടുണ്ട്.
ഹിജ്റ വര്ഷ പ്രകാരം റബീഉല് അവ്വല് മാസം 12നാണ് പ്രവാചകന്റെ ജന്മദിനം. എ ഡി 570ല് മക്കയിലാണ് മുഹമ്മദ് നബി ജനിച്ചത്. പ്രവാചകന് പകര്ന്ന വെളിച്ചം സ്വന്തം ജീവിതത്തില് പകര്ത്താന് വിശ്വാസികളെ ഓര്മിപ്പിക്കുന്ന ദിനം കൂടിയാണ് നബി ദിനം. കേരളത്തിലെ മസ്ജിദുകളും മദ്റസകളും കേന്ദ്രീകരിച്ചാണ് മിലാദ് ആഘോഷം. പ്രവാചകപ്പിറവിയുടെ പുണ്യസ്മരണകളുയര്ത്തുന്ന സന്ദേശജാഥകള്, കുട്ടികളുടെ കലാപരിപാടികള്, പ്രവാചകന്റെ അപദാനങ്ങള് വാഴ്ത്തുന്ന മൗലിദ് പാരായണവും അന്നദാനവും തുടങ്ങിയവയാണ് നബിദിനത്തിന്റെ ഭാഗമായി നടക്കുന്നത്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
