തിരുവനന്തപുരം: തിരുവനന്തപുരം മെഡിക്കല് കോളേജ് യൂറോളജി വിഭാഗം മേധാവി ഡോ. ഹാരിസ് ചിറയ്ക്കലിന്റെ വെളിപ്പെടുത്തലില് അന്വേഷണത്തിന് ഉത്തരവിട്ട് ആരോഗ്യവകുപ്പ്. അന്വേഷണത്തിന് നാലംഗ സമിതിയെ നിയമിച്ചു. ആലപ്പുഴ മെഡിക്കല് കോളേജ് പ്രിന്സിപ്പല് ബി പത്മകുമാറിന്റെ നേതൃത്വത്തിലാണ് അന്വേഷണം.
കോട്ടയം മെഡിക്കല് കോളേജ് സൂപ്രണ്ട് ടി കെ ജയകുമാര്, ഡോ. എസ് ഗോമതി, ഡോ. എ രാജീവന് എന്നിവരാണ് അന്വേഷണ സമിതിയിലെ മറ്റ് അംഗങ്ങള്. അടിയന്തരമായി റിപ്പോര്ട്ട് സമര്പ്പിക്കാനാണ് സര്ക്കാരിന്റെ നിര്ദേശം.
മെഡിക്കല് കോളേജിലെ ഉപകരണക്ഷാമത്തെക്കുറിച്ച് ഡോ. ഹാരിസ് ചിറയ്ക്കല് ഉയര്ത്തിയ ആരോപണങ്ങള് വലിയ ചര്ച്ചയായിരുന്നു. ആശുപത്രിയില് ഉപകരണങ്ങള് ഇല്ലെന്നും, അവ വാങ്ങിനല്കാന് ഉദ്യോഗസ്ഥരും മറ്റുള്ളവരുടെയും ഭാഗത്തുനിന്നും നടപടിയുണ്ടാകുന്നില്ലെന്നുമായിരുന്നു ഹാരിസ് ചിറയ്ക്കല് പറഞ്ഞത്.
ഗുരുതര പ്രശ്നങ്ങളുമായി വരുന്ന രോഗികളുടെ ഓപ്പറേഷന് അടക്കം മാറ്റിവെയ്ക്കേണ്ടിവരികയാണെന്നും മികച്ച ചികിത്സ നല്കാന് ഡോക്ടര്മാര് തയ്യാറായിട്ട് പോലും അനങ്ങാപ്പാറ പോലെ ബ്യൂറോക്രസിയുടെ മതില് മുന്പില് നില്ക്കുകയാണെന്നും ഡോ ഹാരിസ് ചിറയ്ക്കല് കുറ്റപ്പെടുത്തിയിരുന്നു. പലരോടും അപേക്ഷിച്ചിട്ടും യാതൊരു പരിഹാരവും ഇല്ലെന്നും ഹാരിസ് പറഞ്ഞിരുന്നു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
