HIGHLIGHTS : തിരുവനന്തപുരം : നെയ്യാറ്റിന്കരയില് സ്ഥലം ഒഴിപ്പിക്കുന്നതിനിടെ ദമ്പതിമാര് തീ കൊളുത്തി മരിച്ച സംഭവത്തില് പൊലീസിന്റെ വീഴ്ച അന്വേഷിക്കാന് ഉത്തരവിട...
തിരുവനന്തപുരം : നെയ്യാറ്റിന്കരയില് സ്ഥലം ഒഴിപ്പിക്കുന്നതിനിടെ ദമ്പതിമാര് തീ കൊളുത്തി മരിച്ച സംഭവത്തില് പൊലീസിന്റെ വീഴ്ച അന്വേഷിക്കാന് ഉത്തരവിട്ട് ഡിജിപി ലോകനാഥ് ബെഹ്റ.മരണ കാരണം പൊലീസിന്റെ അനാസ്ഥയെന്ന് പരാതി ഉയര്ന്ന സാഹചര്യത്തിലാണ് അന്വേഷണം. റൂറല് എസ്.പി യാണ് സംഭവം അന്വേഷിക്കുക.
ആത്മഹത്യാഭീഷണി മാത്രമായിരുന്നു ലക്ഷ്യമെന്നും പൊലീസ് ഇടപെട്ടതോടെയാണ് തീ കൊളുത്തേണ്ടി വന്നതെന്നും മരിക്കുന്നതിന് മുന്പായി രാജന് മൊഴി നല്കിയിരുന്നു. പൊള്ളലേറ്റ് മെഡിക്കല് കോളജ് ആശുപത്രിയില് ചികിത്സയിലിരിക്കെയാണ് രാജനും പിന്നാലെ ഭാര്യ അമ്പിളിയും മരിച്ചത് .തിരുവനന്തപുരം മെഡിക്കല് കോളജില് സൂക്ഷിച്ചിരിക്കുന്ന അമ്പിളിയുടെ മൃതദേഹം പോസ്റ്റ്മാര്ട്ടത്തിന് ശേഷം ഇന്ന് ബന്ധുക്കള്ക്ക് വിട്ട് നല്കും.
സംഭവം നടന്ന് മണിക്കൂറുകള്ക്കകം ഒഴിപ്പിക്കല് നടപടി സ്റ്റേ ചെയ്തുകൊണ്ടുള്ള ഹൈക്കോടതി ഉത്തരവ് വന്നിരുന്നു. എന്നാല് ഇത് മുന്കൂട്ടി അറിഞ്ഞാണ് പൊലീസ് ഒഴിപ്പിക്കാനായി എത്തിയതെന്നാണ് മക്കളായ രഞ്ജിത്തിന്റെയും രാഹുലിന്റെയും ആരോപണം. നല്ല ഉദ്ദേശത്തോടെ രാജന്റെ കയ്യില് നിന്നും ലൈറ്റര് തട്ടിമാറ്റാന് ശ്രമിക്കുന്നതിനിടെ തീ ആളിപ്പിടിച്ചുവെന്നാണ് പോലീസിന്റെ വിശദീകരണം.