തിരുവനന്തപുരം: മുഖ്യമന്ത്രി പിണറായി വിജയന് ഇന്ന് 77-ാം പിറന്നാള്. ജന്മ ദിനത്തില് തൃക്കാക്കര ഉപതെരഞ്ഞെടുപ്പ് പ്രചാരണ തിരക്കിലാണ് മുഖ്യമന്ത്രി. സാധാരണ പിണറായി വിജയന് തന്റെ ജന്മദിനം ആഘോഷിക്കാറില്ല. പതിവ പോലെ ഇത്തവണയും പ്രത്യേക ആഘോഷങ്ങളോ ചടങ്ങുകളോ ഒന്നുമുണ്ടാവില്ല. കൊച്ചിയിലുള്ള മുഖ്യമന്ത്രി മേയ് 27 വരെ തിരഞ്ഞെടുപ്പ് പ്രചാരണ രംഗത്തുണ്ടാകും.
ആറ് വര്ഷം മുമ്പ് അദ്ദേഹത്തിന്റെ നേതൃത്വത്തില് സര്ക്കാര് സത്യപ്രതിജ്ഞ ചെയ്യുന്നതിന് തലേദിവസം ജന്മദിനമായിരുന്നു. 1945 മേയ് 24ന് കണ്ണൂരിലെ തലശ്ശേരിയിലെ പിണറായി പഞ്ചായത്തിലാണ് അദ്ദേഹം ജനിച്ചത്. കണ്ണൂര് പാറപ്പുറംകാരായ കോരന്റേയും കല്യാണിയുടേയും ഇളയമകന്.
വിദ്യാര്ത്ഥിയായിരിക്കെ എസ്എഫ്ഐയുടെ പൂര്വ്വീക സംഘടനയായ കെഎസ്എഫിലൂടെയായിരുന്നു രാഷ്ട്രീയ പ്രവേശം. 1970ല് 26-ാം വയസ്സില് കൂത്തുപറമ്പില് നിന്ന് ജയിച്ച് നിയമസഭാ അംഗമായി. 2016ല് ധര്മ്മടത്ത് നിന്ന് ജയിച്ച് പതിനാലാമത് മുഖ്യമന്ത്രിയായി. 2021ല് സംസ്ഥാന ചരിത്രത്തിലാദ്യമായി തുടര്ഭരണത്തിലൂടെ വീണ്ടും മുഖ്യമന്ത്രി പദത്തിലെത്തി..
