HIGHLIGHTS : Attukal Pongala; Pongala can be performed at home following the Kovid protocol
കോവിഡ് വ്യാപനത്തിന്റെ പശ്ചാത്തലത്തില് ഈ വര്ഷത്തെ ആറ്റുകാല് പൊങ്കാല പരിമിതമായ രീതിയില് നടത്താന് തീരുമാനിച്ചുവെന്ന് മന്ത്രി വി ശിവന്കുട്ടി. ഭഗവതിക്ഷേത്ര പരിസരത്ത് 200 പേരെ മാത്രം അനുവദിക്കാനും മുഖ്യമന്ത്രിയുടെ അധ്യക്ഷതയില് ചേര്ന്ന കോവിഡ് അവലോ
കന യോഗം തീരുമാനിച്ചു. ഈ മാസം 9 മുതല് 18 വരെയാണ് ആറ്റുകാല് ഉത്സവം. 17നാണു പൊങ്കാല.
ആചാരപരമായ എല്ലാ ചടങ്ങുകളോടും കൂടി കോവിഡ് പ്രോട്ടോകോള് പാലിച്ചാകും പരിപാടികള്. പൊതു വിദ്യാഭ്യാസ മന്ത്രിയുടെ അധ്യക്ഷതയില് ദേവസ്വം മന്ത്രി കെ രാധാകൃഷ്ണന്, ഗതാഗത മന്ത്രി ആന്റണി രാജു, മേയര് ആര്യാ രാജേന്ദ്രന് തുടങ്ങിയവര് പങ്കെടുത്ത അവലോകന യോഗമാണ് ക്രമീകരണങ്ങളോടെ പൊങ്കാല നടത്താന് തീരുമാനിച്ചത്.
പൊതുസ്ഥലങ്ങളിലും, പൊതു നിരത്തുകളിലും പൊങ്കാല ഇടാന് അനുവദിക്കില്ല. വീടുകളില് പൊങ്കാലയിടാം. ക്ഷേത്ര പരിസരത്ത് പൊങ്കാല പ്രമാണിച്ച് വിവിധ വകുപ്പുകളുടെ ഏകോപനത്തിനും കോവിഡ് പ്രോട്ടോകോള് ഉറപ്പ് വരുത്തുന്നതിനുമായി ക്രമീകരണങ്ങള് ഏര്പ്പെടുത്തും. വീട്ടുവളപ്പുകളില് ഇടുന്ന പൊങ്കാല റോഡിലേക്ക് വ്യാപിക്കുവാന് അനുവദിക്കുന്നതല്ല. കൂടാതെ വീട്ടുടമസ്ഥന് സ്വന്തം നിലയ്ക്ക് തന്നെ വീടുകളിലെ പൊങ്കാല വലിയ ആള്ക്കൂട്ടത്തിന് ഇടവരുത്താതെ കോവിഡ് പ്രോട്ടോകോള് കര്ശനമായി പാലിച്ച് നിര്വ്വഹിക്കാന് ശ്രദ്ധിക്കേണ്ടതാണ് എന്ന് മന്ത്രി വി ശിവന്കുട്ടി വ്യക്തമാക്കി.