തിരുവനന്തപുരം : നിലമ്പൂരില് ആര്യാടന് ഷൗക്കത്ത് യുഡിഎഫ് സ്ഥാനാര്ത്ഥി. കെപിസിസി നല്കിയ പേര് അംഗീകരിച്ച് എഐസിസി സ്ഥാനാര്ത്ഥി പ്രഖ്യാപനം നടത്തി.
കൊച്ചിയില് കെപിസിസി അധ്യക്ഷന് സണ്ണി ജോസഫിന്റെ നേതൃത്വത്തില് നേതാക്കളുടെ നിര്ണായക യോഗം ചേര്ന്നാണ് സ്ഥാനാര്ഥിയെ തീരുമാനിച്ചത്. വൈകീട്ട് അഞ്ചുമണിയോടെ വീണ്ടും യോഗം ചേര്ന്ന ശേഷം ഷൗക്കത്തിന്റെ പേര് ഹൈക്കമാന്ഡിന് കൈമാറുകയായിരുന്നു..
മലപ്പുറം ഡിസിസി അധ്യക്ഷന് വി എസ് ജോയിയെ സ്ഥാനാര്ത്ഥിയാകണമെന്ന പിവി അന്വറിന്റെ ആവശ്യത്തിന് യുഡിഎഫ് വഴങ്ങിയില്ല. ഇടതുമുന്നണി അംഗമായിരുന്ന പി.വി.അന്വര് രാജിവച്ചതിനെ തുടര്ന്നാണ് മണ്ഡലത്തില് ഉപതിരഞ്ഞെടുപ്പ് വേണ്ടിവന്നത്. ജൂണ് 19-നാണ് ഉപതിരഞ്ഞെടുപ്പ്.
ഞങ്ങള് സജ്ജമാണെന്നും എല്ലാവരെയും കൂടി യോജിപ്പിച്ചു വിജയം നേടുമെന്നും പ്രതിപക്ഷ നേതാവ് വിഡി സതീശന് വാര്ത്താസമ്മേളനത്തില് പറഞ്ഞു. അന്വര് യുഡിഎഫിന്റെ ഭാഗമാകുമെന്ന് പറഞ്ഞിരുന്നു. അന്വറിന്റെ റോള് എന്തെന്ന് ഉടന് പ്രഖ്യാപിക്കും. ഇന്നലെ ഞായറാഴ്ചയായതിനാലാണ് സ്ഥാനാര്ത്ഥി പ്രഖ്യാപനം വൈകിയതെന്നാണ് പ്രതിപക്ഷനേതാവിന്റെ വിശദീകരണം.
