നിര്മിത ബുദ്ധി ഉപയോഗിച്ച് വ്യാജ വീഡിയോ കോളിലൂടെ പണംതട്ടിയ സംഭവത്തില് പരാതിക്കാരന് നഷ്ടപ്പെട്ട 40000 രൂപ കേരള പോലീസ് സൈബര് വിഭാഗം തിരിച്ചു പിടിച്ചു. കേരളത്തില് ആദ്യമായി റിപ്പോര്ട്ട് ചെയ്യപ്പെട്ട ഈ തട്ടിപ്പിന്റെ അന്വേഷണത്തിലാണ് സൈബര് ഓപ്പറേഷന് വിഭാഗത്തിന്റെ നേട്ടം. കോഴിക്കോട് സ്വദേശി രാധാകൃഷ്ണനെ വാട്സാപ്പ് വീഡിയോ കോളിലൂടെ സുഹൃത്താണെന്ന് തെറ്റിദ്ധരിപ്പിച്ചാണ് 40000 രൂപ തട്ടിയെടുത്തത്. ആന്ധ്രാപ്രദേശില് ഒപ്പം ജോലി ചെയ്തിരുന്ന ആളുമായി സാദൃശ്യമുള്ള രൂപമാണ് വീഡിയോകോളില് കണ്ടത്. മാത്രമല്ല പരിചയമുള്ള ആളുകളുടെ പേരുകള് പറഞ്ഞു വിശ്വസിപ്പിക്കുകയും ചെയ്തു. താന് ഇപ്പോള് ദുബൈയിലാണെന്നും ബന്ധുവിന്റെ ചികിത്സക്കായി പണം അത്യാവശ്യമാണെന്നും നാട്ടില് എത്തിയാലുടന് തിരിച്ചു നല്കാമെന്നും പറഞ്ഞായിരുന്നു തട്ടിപ്പ്.
ആദ്യം 40000 രൂപ ആവശ്യപ്പെട്ടയാള് വീണ്ടും 35000 രൂപ ആവശ്യപ്പെട്ടപ്പോള് സംശയം തോന്നുകയും യഥാര്ത്ഥ സുഹൃത്തിനെ ബന്ധപ്പെട്ടപ്പോഴാണ് തട്ടിപ്പിനിരയായ വിവരം മനസിലായത്. 1930 ല് രജിസ്റ്റര് ചെയ്ത പരാതിയുടെ അടിസ്ഥാനത്തില് അദ്ദേഹത്തിന് നഷ്ടപ്പെട്ട മുഴുവന് തുകയും (40000) കേരള പോലീസിന്റെ സൈബര് ഓപ്പറേഷന് വിഭാഗം ബാങ്കുകളുടെ സഹായത്തോടെ തട്ടിപ്പുകാരില്നിന്ന് തിരിച്ചു പിടിച്ചു.
പരിചയമില്ലാത്ത വീഡിയോ, ഓഡിയോ കോളിലൂടെ സാമ്പത്തിക സഹായത്തിനായി അഭ്യര്ത്ഥന നടത്തിയാല് തീര്ച്ചയായും ഒഴിവാക്കുക. ഇത്തരത്തില് വ്യാജകോളുകള് ലഭിച്ചാല് ഉടന് ആ വിവരം കേരളാ സൈബര് ഹെല്പ് ലൈന് നമ്പരായ 1930ല് അറിയിക്കണം. ഈ സേവനം 24 മണിക്കൂറും ലഭ്യമാണ്.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
