കര്ണാടക:ഷിരൂരിലെ മണ്ണിടിച്ചിലില് കാണാതായ അര്ജുനായുള്ള തിരച്ചില് 12-ാം ദിവസത്തിയപ്പോള് ഗംഗാവലി പുഴയുടെ ആഴങ്ങളിലേക്കിറങ്ങി ആദ്യമായി പരിശോധന. ഡൈവര്മാര് പുഴയിലേക്കിറങ്ങി തിരച്ചില് നടത്തുകയാണ്. ഈശ്വര് മാല്പെയുടെ നേതൃത്വത്തിലാണ് നദിയില് നിര്ണായക ദൗത്യം നടക്കുന്നത്. വടമുപയോഗിച്ച് ശരീരത്തില് ബന്ധിച്ച ശേഷമാണ് ഡൈവര്മാര് ഇറങ്ങിയത്.
നിലവില് അര്ജുന്റേതെന്ന് കരുതുന്ന ട്രക്ക് ഉണ്ടെന്ന് ഉറപ്പിച്ച പോയിന്റ് നമ്പര് ഫോറിലാണ് പരിശോധനകള് നടക്കുന്നത്. ഇരുപതിലേറെ നിര്ണായക രക്ഷാദൗത്യത്തില് പങ്കാളിയായിട്ടുള്ള വിദഗ്ധനാണ് ഈശ്വര് മാല്പെ. ഗംഗാവാലി പുഴയെ നന്നായറിയുന്ന പ്രദേശത്തെ മത്സ്യത്തൊഴിലാളി സംഘവും മാല്പെയുടെ സംഘത്തിനൊപ്പമുണ്ടെന്നാണ് റിപ്പോര്ട്ട്.
അര്ജുന് സഞ്ചരിച്ച ട്രക്കിന്റെ ചിത്രം ഗംഗാവലിപ്പുഴയിലെ ഡ്രോണ് പരിശോധനയില് ലഭിച്ചെന്ന് കന്വാര് എംഎല്എ സതീഷ് കൃഷ്ണ സെയില് മാധ്യമങ്ങളോട് പറഞ്ഞു.ചെരിഞ്ഞ നിലയിലാണ് ട്രക്കെന്നും അദ്ദേഹം മാധ്യമങ്ങളോട് പറഞ്ഞു. റഡാര്, സോണല് സിഗ്നലുകള് കണ്ട സ്ഥലത്ത് നിന്നാണ് ട്രക്കിന്റെ സാന്നിധ്യം കണ്ടെത്തിയത്.
