നടിയെ ആക്രമിച്ച കേസില് വിചാരണ പൂര്ത്തിയാക്കാന് കൂടുതല് സമയം അനുവദിച്ച് സുപ്രീം കോടതി. ജനുവരി 31വരെയാണ് സമയം അനുവദിച്ചത്. വിചാരണ പൂര്ത്തിയാക്കി വിധി പ്രസ്താവിക്കാന് കൂടുതല് സമയം തേടി ജഡ്ജി ഹണി എം.വര്ഗീസ് സുപ്രീം കോടതിയെ സമീപിച്ചിരുന്നു. 6 മാസം കൂടിയാണ് സമയം തേടിയത്.
ഹര്ജി പരിഗണിച്ച ജസ്റ്റിസ് ദിനേശ് മഹേശ്വരിയും ജസ്റ്റിസ് ബേല എം.ത്രിവേദിയും ഉള്പ്പെട്ട ബെഞ്ച് ഈ ആവശ്യം അംഗീകരിച്ചു, വിചാരണ പൂര്ത്തിയാക്കാന് കൂടുതല് സമയം അനുവദിച്ചു. വിചാരണ സമയബന്ധിതമായി പൂര്ത്തിക്കാന് എല്ലാവരും സഹകരിക്കണമെന്ന് കോടതി ആവശ്യപ്പെട്ടു. വിചാരണയുടെ പുരോഗതി സംബന്ധിച്ച ഒരു റിപ്പോര്ട്ട് നാലാഴ്ചയ്ക്കകം നല്കാനും സുപ്രീം കോടതി നിര്ദേശിച്ചു.
വിചാരണ സമയബന്ധിതമായി പൂര്ത്തിയാക്കാന് കോടതിക്ക് നിര്ദേശം നല്കണമെന്നാവശ്യപ്പെട്ട് പ്രതിയായ ദിലീപ് നല്കിയ ഹര്ജിയും സുപ്രീം കോടതി ഇതോടൊപ്പം പരിഗണിച്ചു. സര്ക്കാരും പരാതിക്കാരിയും കേസ് നടപടികള് നീട്ടിക്കൊണ്ടു പോകുകയാണെന്നും ദിലീപിന് വേണ്ടി ഹാജരായ അഭിഭാഷകന് കോടതിയെ അറിയിച്ചു. എന്നാല് ഇക്കാര്യത്തില് സുപ്രീംകോടതി ഇടപെട്ടില്ല. ഹൈക്കോടതിയുടേയോ വിചാരണ കോടതിയുടെയോ നടപടികളില് ഇടപെടില്ലെന്ന നിലപാട് കോടതി സ്വീകരിച്ചു, കേസ് അതീവ പ്രാധാന്യമുള്ളതാണെന്നും ബെഞ്ച് പരാമര്ശിച്ചു.
