HIGHLIGHTS : Accidental death of models; No. 18 hotel owner arrested
കൊച്ചി: മുന് മിസ് കേരളയടക്കം മൂന്നുപേര് വാഹനാപകടത്തില് മരിച്ച കേസില് ഫോര്ട്ട് കൊച്ചിയിലെ നമ്പര് 18 ഹോട്ടലുടമ റോയി വയലാട്ടിനെയും അഞ്ചു ജീവനക്കാരേയും അറസ്റ്റ് ചെയ്തു. ഡിജെ പാര്ട്ടിയുടെ ദൃശ്യങ്ങള് നശിപ്പിച്ച കുറ്റം ചുമത്തിയാണ് അറസ്റ്റ്.
ഹോട്ടലുടമയെ എറണാകുളം എ.സി.പി.യുടെ ഓഫീസില് വിളിച്ചുവരുത്തി അന്വേഷണ സംഘം ചോദ്യം ചെയ്ത് വരികയായിരുന്നു. ഇയാള് ഒരു ഡിജിറ്റല് വീഡിയോ റെക്കോര്ഡര്(ഡി.വി.ആര്) പോലീസിന് കൈമാറിയിരുന്നു. എന്നാല് വിവാദ സി.സി.ടി.വി ദൃശ്യങ്ങള് ഉള്പ്പെടുന്ന ഡിജിറ്റല് വീഡിയോ റെക്കോര്ഡര് നശിപ്പിച്ചുവെന്നാണ് വിവരം. ഇതിന്റെ അടിസ്ഥാനത്തിലാണ് അറസ്റ്റ്.
മരണത്തില് ദുരൂഹത നീക്കണമെന്നാവശ്യപ്പെട്ട് കൊല്ലപ്പെട്ട ആന്സി കബീറിന്റെ കുടുബം രംഗത്തെത്തി.
ആന്സിയുടെയും അഞ്ജനയുടെയും മരണവുമായി ബന്ധപ്പെട്ട് നമ്പര് 18 ഹോട്ടലുടമ റോയ് വയലാറ്റിനെ സംശയമുണ്ടെന്നും കുടുബം ആരോപിച്ചു. ഹോട്ടലില് ഉണ്ടായ പ്രശ്നങ്ങള് എന്തെല്ലാമാണെന്ന് അന്വേഷിക്കണമെന്നും സിസിടിവി ദൃശ്യങ്ങള് നശിപ്പിച്ചത് എന്തിനാണെന്ന് അറിയണമെന്നും ആവശ്യപ്പെട്ട് ആന്സി കബീറിന്റെ കുടുംബം പൊലീസില് പരാതി നല്കി. ഔഡി കാര് പിന്തുടര്ന്നത് എന്തിനാണെന്ന് കണ്ടെത്തണം. ഇതുവരെയുള്ള പൊലീസ് അന്വേഷണത്തില് തൃപ്തിയുണ്ടെന്നും കുടുംബം വ്യക്തമാക്കി.
അതേസമയം സംഭവവുമായി ബന്ധപ്പെട്ട് നമ്പര് 18 ഹോട്ടലില് പൊലീസ് വീണ്ടും പരിശോധന നടത്തുകയാണ്. ഹോട്ടലിലെ ദൃശ്യങ്ങളടങ്ങിയ ആദ്യം ലഭിച്ച ഡി.വി.ആര് സൈബര് ഫൊറന്സിക് പരിശോധനയ്ക്ക് അയക്കും. ഡി.വി.ആറില് എന്തെങ്കിലും തിരിമറി നടന്നിട്ടുണ്ടോ എന്ന് പരിശോധിക്കുമെന്നും പൊലീസ് അറിയിച്ചു.