തിരൂര് : വ്യാജ ഇന്സ്റ്റഗ്രാം അക്കൗണ്ടിലൂടെ വിദ്യാര്ത്ഥിനിയുടെ ഫോട്ടോകള് പോസ്റ്റ് ചെയ്തു പണം തട്ടിയ യുവാവ് അറസ്റ്റില് .താനൂര് നന്നമ്പ്ര സ്വദേശിയായ വിഷ്ണുജിത്ത് (18) ആണ് തിരൂര് പോലീസിന്റെ പിടിയിലായത്. യുവാവ് വ്യാജ ഇന്സ്റ്റഗ്രാം അക്കൗണ്ട് ഉണ്ടാക്കി വിദ്യാര്ഥിനിയുടെ നിരവധി ഫോട്ടോകള് അതുവഴി പോസ്റ്റ് ചെയ്ത് ആ അക്കൗണ്ടിലൂടെ സുഹൃത്തുക്കളെ കണ്ടെത്തി വിദ്യാര്ത്ഥിനിയാണെന്ന വിധത്തില് ചാറ്റ് ചെയ്തത് സൗഹൃദം ഉണ്ടാക്കി വീഡിയോ കോള് ചെയ്യാം എന്നും മറ്റു നിരവധി വാഗ്ദാനങ്ങളും നല്കി പണം തട്ടിയെടുക്കുകയായിരുന്നു.
പരാതിക്കാരിയുടെ ഫോട്ടോ മറ്റൊരു ഇന്സ്റ്റഗ്രാം അക്കൗണ്ടില് സ്ഥിരമായി പോസ്റ്റ് ചെയ്യുന്നത് കണ്ടു സുഹൃത്ത് അന്വേഷിച്ചപ്പോഴാണ് ഈ വിവരം പരാതിക്കാരി അറിഞ്ഞിട്ടുള്ളത്. തുടര്ന്നാണ് പരാതിക്കാരി തിരൂര് പോലീസ് സ്റ്റേഷനില് കേസ് രജിസ്റ്റര് ചെയ്തത്. തുടര്ന്ന് പോലീസ് നടത്തിയ അന്വേഷണത്തിലാണ് യുവാവിനെ പിടികൂടിയത്. അഞ്ചില് അധികമാളുകളില് നിന്നും ഇയാള് ഇതേ രീതിയില് പണം തട്ടിയിട്ടുള്ളതായും അന്വേഷണം പുരോഗമിക്കുന്നതായും തിരൂര് പോലീസ് അറിയിച്ചു. ഇയാള് തിരൂരില് ഡിഗ്രി വിദ്യാര്ത്ഥിയാണ്.
തിരൂര് ഡിവൈഎസ്പി കെ എം ബിജുവിന്റെ നിര്ദ്ദേശാനുസരണം തിരൂര് ഇന്സ്പെക്ടര് ജിനേഷ് കെ ജെ തിരൂര് സബ് ഇന്സ്പെക്ടര് സുജിത്ത് ആര് പി എന്നിവരുടെ നേതൃത്വത്തില് സബ് ഇന്സ്പെക്ടര് ദിനേശന്, സീനിയര് സിവില് പോലീസ് ഓഫീസറായ ജിനേഷ് കെ,സിവില് പോലീസ് ഓഫീസര് ആയ അരുണ് എന്നിവരാണ് പ്രതിയെ പിടികൂടിയത്.
