കോഴിക്കോട്: മീഞ്ചന്ത ഫാത്തിമ മഹലില് പി കെ ഫാത്തിമബീയുടെ ബാങ്ക് അക്കൗണ്ടില്നിന്നും അവരറിയാതെ അജ്ഞാതന് 19 ലക്ഷം തട്ടിയ പരാതിയില് പന്നിയങ്കര പൊലീസ് കേസെടുത്തു. എടിഎം കാര്ഡോ ഓണ്ലൈന് വഴിയോ പണമിടപാട് നടത്താത്ത വീട്ടമ്മയുടെ യൂണിയന് ബാങ്ക് ഓഫ് ഇന്ത്യ ചെറൂട്ടി റോഡ് ശാഖയിലെ അക്കൗണ്ടില്നിന്നുമാണ് പണം നഷ്ടമായത്.
കഴിഞ്ഞ ദിവസം ബാങ്ക് പാസ് ബുക്ക് ഉപയോഗിച്ച് സ്റ്റേറ്റ്മെന്റ് പരിശോധിച്ചപ്പോഴാണ് പണം നഷ്ടപ്പെട്ടതായി കണ്ടെത്തിയത്. ബാങ്കില് അറിയിച്ചതിനാല് കൂടുതല് നഷ്ടം ഒഴിവായി. ജൂലൈ 24നും സെപ്തംബര് 19നുമിടയില് തവണകളായാണ് പണം പിന്വലിച്ചത്. ആദ്യം 500 രൂപ, ആയിരം, 10,000, തുടര്ന്ന് ഓരോ ലക്ഷം വീതവും പിന്വലിച്ചു. ബാങ്കുമായി ബന്ധിപ്പിച്ച മൊബൈല് ഫോണ് നമ്പര് ആറ് കൊല്ലം മുമ്പ് ഇവര് ഉപേക്ഷിച്ചിരുന്നു. കഴിഞ്ഞ മാര്ച്ചില് കെവൈസി പുതുക്കാന് നല്കിയപ്പോള് പുതിയ നമ്പര് നല്കിയെങ്കിലും ബാങ്ക് മാറ്റം വരുത്താത്തതാണ് പണം പിന്വലിക്കാന് അജ്ഞാതന് അവസരമൊരുക്കിയതെന്ന് ബന്ധുക്കള് പറഞ്ഞു.
പഴയ നമ്പര് ഉപയോഗിക്കുന്നയാളാവാം പണം പിന്വലിച്ചതെന്നാണ് പ്രാഥമിക നിഗമനം. അയാളെ കണ്ടെത്താനാണ് സൈബര് പൊലീസ് സഹായത്തോടെ പന്നിയങ്കര പൊലീസ് ശ്രമിക്കുന്നത്.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
