HIGHLIGHTS : Union Ministers should also count potholes on national highways; Minister Muhammad Riaz
തിരുവനന്തപുരം : പൂര്ത്തിയാകാറായ പദ്ധതികള്ക്ക് മുന്നില് നിന്ന് പടമെടുത്ത് പോകുന്ന കേന്ദ്ര മന്ത്രിമാര് ദേശീയ പാതയിലെ കുഴികള് കൂടി എണ്ണണമെന്ന് പൊതുമരാമത്ത് മന്ത്രി മുഹമ്മദ് റിയാസ് നിയമസഭയില് പറഞ്ഞു. കേരളത്തില് ജനിച്ച് വളര്ന്ന ഒരു കേന്ദ്രമന്ത്രിയുണ്ട്. അദ്ദേഹം നടത്തുന്ന വാര്ത്താ സമ്മേളനങ്ങളേക്കാള് കുഴികള് ദേശീയ പാതയിലുണ്ട്. പലതവണ പരാതി പറഞ്ഞിട്ടും ഫലമുണ്ടായില്ലെന്നും മന്ത്രി കുറ്റപ്പെടുത്തി.
ദേശീയ പാത വികസനത്തിന് ഭൂമി ഏറ്റെടുക്കാന് 25 ശതമാനം തുകയാണ് കേരളം നല്കിയത്. ഇന്ത്യയിലെ മറ്റൊരു സംസ്ഥാനവും തയ്യാറാകാത്ത കാര്യമാണിതെന്നും പൊതുമരാമത്ത് മന്ത്രി മുഹമ്മദ് റിയാസ് പറഞ്ഞു. എല്ലാവരെയും ഉള്ക്കൊള്ളിച്ചു കൊണ്ടാണ് വികസന പദ്ധതികളുമായി മുന്നോട്ടുപോകുന്നത്. വികസനത്തിന്റെ എവര്റോളിംഗ് ട്രോഫി ആഗ്രഹിച്ചല്ല ഇതെന്നും പൊതുമരാമത്ത് മന്ത്രി പറഞ്ഞു.
ഇപ്പോള് നമ്മുടെ സംസ്ഥാനത്തേക്ക് ഒരുപാട് കേന്ദ്രമന്ത്രിമാര് വരുന്നുണ്ട്. അത്തരം കേന്ദ്രമന്ത്രിമാര് ദേശീയപാത അതോറിറ്റിയുടെ കീഴിലുള്ള റോഡുകളുടെ കുഴികള് എണ്ണാനും അത് അടയ്ക്കാനും കൂടി ചുമതലയെടുത്ത് ശ്രദ്ധിക്കുന്നത് നന്നാകും’- റിയാസ് നിയമസഭയില് പറഞ്ഞു.