കോഴിക്കോട്: സ്വന്തം വീട്ടില് മോഷണം നടത്തിയ യുവാവ് പിടിയില്. പെരുവയല് പരിയങ്ങാട് പുനത്തില് സനീഷ് സ്വന്തം വീട്ടില് നടത്തിയ കവര്ച്ചയാണ് പിടിയിലായത്. പ്രൊഫഷണല് കള്ളന്മാര് വീട് കൊള്ളയടിച്ചെന്ന് തെറ്റിദ്ധരിപ്പിക്കുന്ന തരത്തിലായിരുന്നു സനീഷിന്റെ പ്രവൃത്തികള്. വെള്ളിയാഴ്ച പകല് വീട്ടുകാര് പുറത്ത് പോയ സമയത്താണ് യുവാവ് സ്വന്തം വീട്ടില് തന്നെ മോഷണത്തിനായി കയറിയത്.
ചില അസ്വാഭാവികത തോന്നിയ മാവൂര് പൊലീസാണ് സനീഷിനെ കേന്ദ്രീകരിച്ച് അന്വേഷണം തുടങ്ങിയത്. നേരത്തെ സനീഷ് വീട്ടില് നിന്ന് മുപ്പതിനായിരം രൂപ മോഷ്ടിച്ചിരുന്നു. ഇത് വീട്ടുകാര് അറിഞ്ഞിരുന്നില്ല. ഇതാണ് വീണ്ടും മോഷണത്തിന് പ്രേരണയായതെന്ന് പൊലീസ് പറഞ്ഞു. മോഷണ മുതലും പൂട്ട് മുറിക്കാന് ഉപയോഗിച്ച ആക്സോബ്ലേഡും പൊലീസ് കണ്ടെടുത്തു. കടംവീട്ടാനാണ് മോഷണം നടത്തിയതെന്ന് സനീഷ് പൊലീസിന് മൊഴി നല്കി. കോടതിയില് ഹാജരാക്കിയ സനീഷിനെ റിമാന്ഡ് ചെയ്തു.
കൈയില് കടലാസ് കൈയ്യുറ ധരിച്ച് ഫിങ്കര് പ്രിന്റ് പതിയാതിരിക്കാന് പ്രത്യേകം ശ്രദ്ധിച്ചു. പുറത്തുനിന്നുള്ള കള്ളന്മാരാണ് കൃത്യം ചെയ്തതെന്ന് തെറ്റിദ്ധരിപ്പിക്കുന്നതിനായി മുറികളിലെ അലമാരകള് തുറന്ന് സാധനങ്ങള് വലിച്ച് വാരിയിട്ടു. തെറ്റിദ്ധരിപ്പിക്കാന് വലിയ ഷൂസിന്റെ അടയാളം നിലത്ത് പതിപ്പിച്ചു. മുളക് പൊടിയും വിതറി. ആ പൊടിയില് മനപ്പൂര്വ്വം ഷൂസിന്റെ അടയാളം വരുത്തിയശേഷം ഷൂസിന്റെ സോള് മുറ്റത്ത് ഉപേക്ഷിക്കുകയും ചെയ്തിരുന്നു. വീട്ടുകാര് തിരിച്ചെത്തിയപ്പോഴാണ് മോഷണ വിവരം അറിയുന്നത്.
