തിരുവനന്തപുരം: പാര്ലമെന്ററി കീഴ്വഴക്കങ്ങള് ലംഘിച്ച് കൊണ്ട് ലോക്സഭ പ്രോംടേം സ്പീക്കറെ നിയമിച്ച നടപടി പ്രതിഷേധാര്ഹമാണെന്ന് മുഖ്യമന്ത്രി പിണറായി വിജയന്. സഭയില് ഏറ്റവും കൂടുതല് കാലം അംഗമായിട്ടും മാവേലിക്കര എം പി കൊടിക്കുന്നില് സുരേഷിനെ തഴഞ്ഞത് എന്തിനാണെന്ന് കേന്ദ്ര സര്ക്കാര് വ്യക്തമാക്കേണ്ടതുണ്ട്. സംഘപരിവാര് പിന്തുടരുന്ന സവര്ണ്ണ രാഷ്ട്രീയമാണ് ഈ തീരുമാനത്തിനു പിന്നിലെന്ന് സംശയിക്കുന്നവര്ക്ക് എന്താണ് ബി ജെ പിയുടെ മറുപടിയെന്നും മുഖ്യമന്ത്രി ചോദിച്ചു.
പാര്ലമെന്ററി ജനാധിപത്യ മര്യാദകളെയും സഭയിലെ കീഴ് വഴക്കങ്ങളെയും അംഗീകരിക്കില്ല എന്ന ധാര്ഷ്ട്യമാണ് ബിജെപിക്ക്. ഇക്കഴിഞ്ഞ ലോകസഭയില് ഡെപ്യൂട്ടി സ്പീക്കര് പദവി അഞ്ചു വര്ഷവും ഒഴിച്ചിടുകയായിരുന്നു. പ്രതിപക്ഷ കക്ഷിയില് പെട്ട ആരെയും ആ സ്ഥാനത്ത് അംഗീകരിക്കാന് കഴിയില്ല എന്ന മനോഭാവമായിരുന്നു ഇതിന്റെ പിന്നില്. ബിജെപി നേതൃത്വത്തിന്റെ ഈ ധിക്കാരപരമായ സമീപനം ഇന്ത്യന് ജനാധിപത്യത്തോടുള്ള വെല്ലുവിളിയും അവഹേളനവുമായി മാത്രമേ കാണാന് കഴിയൂവെന്നും മുഖ്യമന്ത്രി പറഞ്ഞു.
പതിനെട്ടാം ലോക്സഭയുടെ പ്രഥമ സമ്മേളനത്തില് ഭര്തൃഹരി മഹ്താബ് ആണ് പ്രോ ടേം സ്പീക്കറാവുക. കോണ്ഗ്രസ് നേതാവ് മാവേലിക്കര എംപി കൊടിക്കുന്നില് സുരേഷിനെ ഒഴിവാക്കിയായിരുന്നു രാഷ്ട്രപതി ദ്രൗപദി മുര്മുവിന്റെ തീരുമാനം. ഈ മാസം 26 നാണ് ലോക്സഭയില് സ്പീക്കര് തെരഞ്ഞെടുപ്പ് നടക്കുക. ഇത് നിയന്ത്രിക്കേണ്ടത് പ്രോ ടൈം സ്പീക്കറാണ്.
പതിനെട്ടാം ലോക്സഭയിലെ അംഗങ്ങളുടെ സത്യപ്രതിജ്ഞയ്ക്ക് ഭര്തൃഹരി മഹ്താബ് മേല്നോട്ടം വഹിക്കും. ബിജെഡിയില് നിന്ന് ബിജെപിയിലെത്തിയ ഭര്തൃഹരി മഹ്താബ് ഏഴാം തവണയാണ് എംപിയാകുന്നത്. ബിഹാറിലെ കട്ടക്കില് നിന്നുള്ള എംപിയാണ്. എട്ട് തവണ എംപിയായ കൊടിക്കുന്നില് സുരേഷാണ് നിലവില് ലോക്സഭയിലെ മുതിര്ന്ന അംഗം.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
