HIGHLIGHTS : Unnati Super League Football; Belyarams FC wins in shootout
ലഹരിക്കെതിരെ കായികം ലഹരിയാക്കുക എന്ന ആശയത്തിലാണ് ടൂര്‍ണമെന്റ് സംഘടിപ്പിച്ചത്
കോഴിക്കോട്:ജില്ലാ ഭരണകൂടത്തിന്റെയും ജില്ലാ സാമൂഹ്യനീതി വകുപ്പിന്റെയും പട്ടികവര്‍ഗ വികസന വകുപ്പിന്റെയും സംയുക്താഭിമുഖ്യത്തില്‍ സംഘടിപ്പിച്ച ഉന്നതി സൂപ്പര്‍ ലീഗ് ഫുട്‌ബോള്‍ ടൂര്‍ണമെന്റില്‍ ബെലിയാരംസ് എഫ് സി ജേതാക്കള്‍.
വട്ടച്ചിറ കോടഞ്ചേരി സാംസ്‌കാരിക നിലയത്തിന്റെ സമീപം മൈതാനിയില്‍ സംഘടിപ്പിച്ച ടൂര്‍ണമെന്റിലെ ഫൈനലില്‍ ഷൂട്ടൗട്ടിലാണ് ബെലിയാരംസ് തുഷാരഗിരി എഫ്‌സി യെ ഒരു ഗോളിന് കീഴടക്കിയത്.
മികച്ച കളിക്കാരനായി തുഷാരഗിരി എഫ് സിയിലെ വിമലിനേയും മികച്ച ഗോള്‍ കീപ്പറായി ബെലിയാരംസ് എഫ് സി യിലെ മനുവിനേയും തെരഞ്ഞെടുത്തു.
നഷാമുക്ത് ഭാരത് അഭിയാന്‍ കേന്ദ്ര പദ്ധതിയുടെ ഭാഗമായാണ് മത്സരം സംഘടിപ്പിച്ചത്. പരിപാടിക്ക് വി കെ സി ഗ്രൂപ്പ് പിന്തുണയേകി. വട്ടച്ചിറ, ചെമ്പുകടവ്, തെയ്യപ്പാറ, മേലെ പൊന്നങ്കയം തുടങ്ങിയ ഉന്നതികളിലെ ക്ലബുകള്‍ക്കായാണ് ടൂര്‍ണമെന്റ് സംഘടിപ്പിച്ചത്.
ശരീരത്തിനും മനസ്സിനും ഹാനികരമാകുന്ന ലഹരിപദാര്‍ത്ഥങ്ങള്‍ക്കെതിരെ കായിക ശീലങ്ങളെ ലഹരിയാക്കുക എന്ന ആശയം മുന്‍നിര്‍ത്തിയാണ് ടൂര്‍ണമെന്റ് സംഘടിപ്പിച്ചത്.
ജില്ലാ കലക്ടര്‍ സ്‌നേഹില്‍ കുമാര്‍ സിംഗിന്റെ നേതൃത്വത്തിലുള്ള ഡി സി റേഞ്ചേഴ്‌സ് എഫ് സി മത്സരത്തില്‍ മാറ്റുരച്ചത് പ്രധാന ആകര്‍ഷണമായി.
ഫൈനല്‍ മത്സരത്തിലെ ടീമുകള്‍ കൂടാതെ ഡി സി റേഞ്ചേഴ്‌സ് എഫ് സി, സ്പാര്‍ക്‌സ് എ ഫ് സി എന്നീ ടീമുകളാണ് സെമി കളിച്ചത്. ആകെ 8 ടീമുകള്‍ പങ്കെടുത്തു.
ലിന്റോ ജോസഫ് എംഎല്‍എ കിക്കോഫ് ചെയ്ത് മത്സരം ഉദ്ഘാടനം ചെയ്തു. കോടഞ്ചേരി ഗ്രാമപഞ്ചായത്ത് വൈസ് പ്രസിഡന്റ് ജമീല അസീസ് സമാപന ചടങ്ങില്‍ മുഖ്യാതിഥിയായി. വാര്‍ഡ് മെമ്പര്‍മാരായ റോസിലി മാത്യു, സിസിലി ജേക്കബ്, ചിന്ന അശോകന്‍, പട്ടികവര്‍ഗ വികസന വകുപ്പ് ജില്ലാ ഓഫീസര്‍, കോടഞ്ചേരി മേഖല എക്സ്റ്റന്‍ഷന്‍ ഓഫീസര്‍ സലീഷ്, പേരാമ്പ്ര മേഖല എക്സ്റ്റന്‍ഷന്‍ ഓഫീസര്‍ ഷമീര്‍, ഊര് മൂപ്പന്‍ അയ്യപ്പന്‍, ഡോ. നിജീഷ് എ തുടങ്ങിയവര്‍ പരിപാടിയില്‍ സംബന്ധിച്ചു.
ജില്ലാ കലക്ടറുടെ ഇന്റേണ്‍ഷിപ്പ് പ്രോഗ്രാം അംഗങ്ങളാണ് പരിപാടിയുടെ ഏകോപനം നിര്‍വഹിച്ചത്.
ദുരുപയോഗത്തിനിടയാക്കുന്ന പൊതുവിടങ്ങള്‍ സൗന്ദര്യവല്‍ക്കരിച്ച് ഗുണപ്രദമായ പരിപാടികള്‍ക്ക് പ്രയോജനപ്പെടുത്തുക എന്ന ലക്ഷ്യത്തില്‍ ആവിഷ്‌കരിച്ച ജില്ലാ ഭരണകൂടത്തിന്റെ ‘ഓപ്പറേഷന്‍ സല്‍സമുക്ക്’ പദ്ധതിയുടെ ഭാഗമായി കോടഞ്ചേരി സാംസ്‌കാരിക നിലയത്തിന്റെ ചുവരില്‍ വാള്‍ പെയിന്റിംഗും നടത്തി. പെയിന്റിംഗിന് ശാരൂപ്, അഭി, സാന്ദ്ര, അനുപ്രിയ എന്നിവര്‍ നേതൃത്വം നല്‍കി.
രാവിലെ 7.30 മുതല്‍ വൈകീട്ട് 4.30 വരെ നീണ്ട ടൂര്‍ണമെന്റിലുടനീളം പ്രദേശവാസികളുടെ നിറഞ്ഞ സാന്നിധ്യമുണ്ടായി.
മലബാറി ന്യൂസ് വാട്‌സ്ആപ്പ് ഗ്രൂപ്പില്‍ അംഗമാവാന്‍ ഈ
ലിങ്കില്‍ ക്ലിക്ക് ചെയ്യു
