HIGHLIGHTS : Two arrested in connection with the incident of dragging a tribal youth along the road
കല്പ്പറ്റ: വയനാട് മാനന്തവാടി കൂടല്കടവില് റോഡിലൂടെ ആദിവാസി യുവാവിനെ കാറില് വലിച്ചിഴച്ച സംഭവത്തില് രണ്ടു പ്രതികള് പോലീസ് പിടിയിലായി. ഹര്ഷിദ്, അഭിരാം എന്നിവരാണ് പിടിയിലായത്. സംഭവത്തില് ഒളിവിലുള്ള വിഷ്ണു, നബീല് എന്നിവര്ക്കായി പൊലീസ് തിരച്ചില് ഊര്ജ്ജിതമാക്കി. പ്രതികള്ക്കെതിരെ വധശ്രമത്തിന് കേസെടുത്തു.പ്രതികള് സഞ്ചരിച്ച വാഹനം പൊലീസ് ഇന്നലെ കസ്റ്റഡിയില് എടുത്തിരുന്നു.
കഴിഞ്ഞ ദിവസമാണ് കൂടല്ക്കടവ് തടയിണയില് കുളിക്കാന് എത്തിയ യുവാക്കള് ചെമ്മാട് ഉന്നതിയിലെ മാതനെ വാഹനത്തില് വലിച്ചിഴച്ച് പരിക്കേല്പ്പിച്ചത്. മാനന്തവാടി മെഡിക്കല് കോളേജ് ആശുപത്രിയില് ചികിത്സയിലാണ് മാതന്. മന്ത്രി ഒ ആര് കേളു മാതനെ സന്ദര്ശിച്ചു.
പ്രതികള് അരകിലോമീറ്ററോളമാണ് മാതനെ പ്രതികള് റോഡിലൂടെ വലിച്ചിഴച്ചത്. പുല്പ്പള്ളി റോഡില് ഇന്നലെ വൈകീട്ടായിരുന്നു ക്രൂരമായ സംഭവം നടന്നത്. കൂടല് കടവ് ചെക്ക് ഡാം കാണാന് എത്തിയ വിനോദ സഞ്ചാരികളുമായുണ്ടായ വാക്ക് തര്ക്കമാണ് മാതനെ റോഡിലൂടെ വലിച്ചിഴക്കാന് കാരണമെന്നാണ് ദൃക്സാക്ഷികള് പറയുന്നത്.
