വാഷിങ്ടണ്: ചൈന ഒഴികെയുള്ള രാജ്യങ്ങള്ക്ക് ഏര്പ്പെടുത്തിയ തീരുവ മരവിപ്പിച്ച് അമേരിക്കന് പ്രസിഡന്റ് ഡോണള്ഡ് ട്രംപ്. 90 ദിവസത്തേക്ക് പകരം തീരുവ 10 ശതമാനം മാത്രമാക്കിയതായി ട്രംപ് അറിയിച്ചു. അതേസമയം, ചൈനയ്ക്ക് മേല് 125 ശതമാനം അധിക തീരുവ ഏര്പ്പെടുത്തുകയും ചെയ്തു. ചൈന 84 ശതമാനം തീരുവ ഏര്പ്പെടുത്തിയതിന് പിന്നാലെയാണ് നടപടി. മൂന്നാംതവണയാണ് ചൈനയ്ക്കുമേല് യുഎസ് അധിക തീരുവ ഏര്പ്പെടുത്തുന്നത്.
യുഎസ് പ്രസിഡന്റ് ഡോണള്ഡ് ട്രംപിന്റെ പകരച്ചുങ്കം നിലവില് വന്നതോടെ ചൈനയും യൂറോപ്യന് യൂണിയനും പകര തീരുവ അമേരിക്കയ്ക്കെതിരെ ചുമത്തിയിരുന്നു. യുഎസ് ഉല്പന്നങ്ങളുടെ തീരുവ 34 ശതമാനത്തില്നിന്നു 84 ശതമാനമായാണ് ചൈന ഉയര്ത്തിയത്. ഏപ്രില് 10 മുതല് പുതിയ തീരുവ നിലവില് വരും. ഇതോടെയാണ് ട്രംപ് ചൈനയ്ക്ക് മേല് 125 ശതമാനം അധിക തീരുവ ഏര്പ്പെടുത്തിയത്.
പ്രതികാരച്ചുങ്കം ചുമത്തിയ രാജ്യങ്ങളെ പരിഹസിച്ച് യുഎസ് പ്രസിഡന്റ് ഡോണാള്ഡ് ട്രംപ് നേരത്തെ രംഗത്ത് വന്നിരുന്നു. തന്നോട് ചര്ച്ച നടത്താന് ശ്രമിക്കുന്ന രാജ്യങ്ങള്, എന്തിനും തയ്യാറാണെന്ന് ട്രംപ് പ്രതികരിച്ചു. ഒത്തു തീര്പ്പിലെത്താന് രാജ്യങ്ങള് വിളിച്ചു കെഞ്ചുകയാണെന്നും ട്രംപ് കൂട്ടിച്ചേര്ത്തു. നാഷണല് റിപ്പബ്ലിക്കന് കോണ്ഗ്രഷണല് കമ്മിറ്റിയില് സംസാരിക്കവെയാണ് ട്രംപിന്റെ പ്രതികരണം. അമേരിക്കയുടെ പകരത്തീരുവ നയം കഴിഞ്ഞ ദിവസം രാവിലെ മുതലാണ് പ്രാബല്യത്തിലായത്. ചൈനയും ഇന്ത്യയും അടക്കം 86 രാജ്യങ്ങള്ക്കെതിരെയാണ് ട്രംപ് ഭീമന് തീരുവകള് ചുമത്തിയിരിക്കുന്നത്. അമേരിക്കയുടെ പുത്തന് നയത്തിന്റെ എറ്റവും വലിയ ഇര ചൈനയാണ്.
അധിക തീരുവ പ്രഖ്യാപനം ട്രംപ് മരവിപ്പിച്ചതോടെ കുതിച്ചുയര്ന്ന് അമേരിക്കന് ഓഹരി വിപണി. ഡൗ ജോണ്സ് സൂചിക 8 ശതമാനം ഉയര്ന്നു. 3000 പോയിന്റിന്റെ നേട്ടമാണ് രേഖപ്പെടുത്തിയത്. നാസ്ഡാക് 12 ശതമാനവും, എസ് ആന്ഡ് പി 500 ഒന്പത് ശതമാനവും മുന്നേറി. കഴിഞ്ഞ ഒരാഴ്ച്ചയില് ലിസ്റ്റഡ് കമ്പനികളുടെ ആകെ വിപണി മൂല്യത്തില് ആറ് ലക്ഷം കോടി ഡോളര് മാഞ്ഞുപോയിടത്ത് നിന്നാണ് ഓഹരി സൂചികകളുടെ തിരിച്ചുവരവ്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
