തിരുവനന്തപുരം: കൃഷ്ണന്റെ ജന്മദിനമായ ഇന്ന് കേരളം അമ്പാടിയാകും.
ഇന്ന് രാവിലെ മുതല് സംസ്ഥാനത്തെ കൃഷ്ണ ക്ഷേത്രങ്ങളില് വിശേഷാല് പൂജകളും പ്രാര്ത്ഥനയും ഉള്പ്പെടെ നടക്കും. ഗുരുവായൂര് ക്ഷേത്രത്തില് അഷ്ടമിരോഹിണി മഹോത്സവം തുടങ്ങി. പൂജകളും ആഘോഷങ്ങളും ഘോഷയാത്രയും നാടന് കലകളുമായി വലിയ ആഘോഷമാണ് ക്ഷേത്രത്തില് ഒരുക്കിയിരിക്കുന്നത്. വന് ഭക്തജന തിരക്ക് അനുഭവപ്പെടുന്നതിനാല് ക്ഷേത്രത്തിലെത്തുന്നവര്ക്കെല്ലാം ദര്ശനം ലഭ്യമാക്കാന് സാധ്യമായ നടപടികള് സ്വീകരിച്ചിട്ടുണ്ടെന്ന് ദേവസ്വം ചെയര്മാന് അറിയിച്ചു. പുലര്ച്ചെ മൂന്നുമണിക്ക് നിര്മ്മാല്യ ദര്ശനത്തോടെ ക്ഷേത്രത്തിലെ അഷ്ടമി രോഹിണി ചടങ്ങുകള് തുടങ്ങി. ഇന്ന് 200ലേറെ കല്യാണമാണ് നടക്കുന്നത്. വിഐപി, സ്പെഷല് ദര്ശനങ്ങളുണ്ടാവില്ല.
ഇന്ന് സംസ്ഥാന വ്യാപകമായി നടക്കുന്ന ശോഭയാത്രകളില് രണ്ടരലക്ഷത്തില് അധികം കുട്ടികള് ഉണ്ണിക്കണ്ണനായി എത്തുമെന്ന് ബാലഗോകുലം സംസ്ഥാന അദ്ധ്യക്ഷന് ആര് പ്രസന്നകുമാര് അറിയിച്ചു. ‘അകലട്ടെ ലഹരി ഉണരട്ടെ മൂല്യവും ബാല്യവും’ എന്ന മുദ്രാവാക്യം മുന് നിര്ത്തിയാണ് ഇത്തവണ ജന്മാഷ്ടമി ആഘോഷങ്ങളുടെ തുടക്കം.ശോഭായാത്രകളില് കുട്ടികള് വിവിധ വേഷധാരികളായാണ് അണിനിരക്കുക. അവതാര കഥകളുടെ ദൃശ്യാവിഷ്കരണവുമായി നിശ്ചലദൃശ്യങ്ങള്, വാദ്യമേളങ്ങള്, കലാരൂപങ്ങള്, ഭജന സംഘങ്ങള് എന്നിങ്ങനെ വിവിധ സംഘങ്ങളാകും നഗര വീഥീകളില് അണി നിരക്കുക.
കുട്ടികള് ശോഭയാത്രയിലൂടെയാകും അവസാനം ക്ഷേത്ര സന്നിധിയില് എത്തുക. അമ്പാടിക്കണ്ണന്, രാധ, ഭാരതാംബ, പാര്വതി, ലക്ഷ്മി ദേവീ, സരസ്വതി ദേവി, സീത, മുരുകന്, ഹനുമാന്, ശിവന്, ലക്ഷ്മണന്, ഭരതന്, ശത്രുഘ്നന് എന്നിങ്ങനെ വിവിധ വേഷങ്ങളിലാകും കുട്ടികളെത്തുക. ക്ഷേത്രത്തിലുള്പ്പെടെ ശോഭയാത്രകളുടെ അവസാനം ഉറിയടി തുടങ്ങി വിവിധ പരിപാടികളും നടക്കും.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
