മീഡിയവണ് ചാനലിന്റെ സംപ്രേഷണം റദ്ദാക്കിയ കേന്ദ്ര സര്ക്കാര് നടപടിക്ക് ഹൈക്കോടതി സ്റ്റേ. നടപടി രണ്ട് ദിവസത്തേക്ക് ഹൈക്കോടതി മരവിപ്പിച്ചു. ഈ സാഹചര്യത്തില് ചാനല് ഉടന് സംപ്രേക്ഷണം പുനരാരംഭിക്കുമെന്ന് മീഡിയ വണ് വൃത്തങ്ങള് അറിയിച്ചു.
ജസ്റ്റിസ് എന്. നഗരേഷിന്റേതാണ് ഇടക്കാല ഉത്തരവ്. ഹരജി വീണ്ടും ബുധനാഴ്ച പരിഗണിക്കും. സംപ്രേഷണം തടഞ്ഞത് രാജ്യസുരക്ഷാ കാരണങ്ങളാലാണെന്നും കോടതി ഇടപെടല് പാടില്ലെന്നും കേന്ദ്ര സര്ക്കാര് കോടതിയില് വാദിച്ചു. ചാനലിന് അനുമതി നിഷേധിച്ചത്തിന് മതിയായ കാരണമുണ്ടെന്നും കേന്ദ്രം കോടതിയെ അറിയിച്ചു. ഇന്ന് ഉച്ചയോടെയാണ് കേന്ദ്ര സര്ക്കാര് അനുമതി നിഷേധിച്ചതിനെ തുടര്ന്ന് മീഡിയവണ് ചാനല് സംപ്രേക്ഷണം നിര്ത്തിയത്.
ഇത് രണ്ടാം തവണയാണ് മീഡിയവണ് സംപ്രേഷണം കേന്ദ്രം തടയുന്നത്. 2021ലെ ഡല്ഹി വംശഹത്യയുടെ സമയത്തും മീഡിയ വണ്, ഏഷ്യാനെറ്റ് ന്യൂസ് ചാനലുകള്ക്ക് കേന്ദ്ര സര്ക്കാര് വിലക്കേര്പ്പെടുത്തിയിരുന്നു. വടക്കുകിഴക്കന് ഡല്ഹിയിലെ സംഘര്ഷങ്ങള് റിപ്പോര്ട്ട് ചെയ്തതില് ചട്ടലംഘനം ആരോപിച്ചായിരുന്നു വിലക്ക്. 48 മണിക്കൂര് നേരത്തേക്കായിരന്നു അന്ന് ചാനല് സംപ്രേക്ഷണം വിലക്കിയിരുന്നത്. പിന്നീട് പ്രതിഷേധത്തെ തുടര്ന്ന് വിലക്ക് പിന്വലിക്കുകയായിരുന്നു.
