തിരുവനന്തപുരം: ലോകായുക്ത ഭേദഗതി ഓര്ഡിനന്സില് ഗവര്ണര് ആരിഫ് മുഹമ്മദ് ഖാന് ഒപ്പിട്ടു. ഇതോടെ പൊതുപ്രവര്ത്തകര്ക്കെതിരായ ലോകായുക്ത വിധി ഇനി സര്ക്കാരിന് തളളാം. ലോകായുക്ത നിയമത്തിലെ 14ാം വകുപ്പിലെ ഭേദഗതിക്കാണ് ഗവര്ണര് അംഗീകാരം നല്കിയത്. ഇതോടെ ഓര്ഡിനന്സ് നിലവില് വന്നു. ഭരണകക്ഷിയില് ഉള്പ്പെട്ട സിപിഐയുടേയും പ്രതിപക്ഷത്തിന്റേയും ബിജെപിയുടേയും എതിര് വാദങ്ങളേയും ഒപ്പിടരുതെന്ന ആവശ്യത്തേയും തള്ളിയാണ് ഗവര്ണറുടെ തീരുമാനം.
നേരത്തെ ലോകായുക്ത അഴിമതിക്കേസില് ഉത്തരവിട്ടാല് അത് കൈമാറേണ്ടത് ഗവര്ണര്, മുഖ്യമന്ത്രി, സര്ക്കാര് എന്നിവര്ക്കാണ്. 1999ലെ ലോകായുതക്ത നിയമത്തിലെ 14ാം വകുപ്പ് പ്രകാരം ലോകായുക്ത വിധി അതേപടി അംഗീകരിച്ച് കുറ്റക്കാരെന്ന് കണ്ടെത്തുന്നവരെ അധികാര സ്ഥാനത്ത് നിന്ന് നീക്കണം. ബന്ധപ്പെട്ട അധികാരി മൂന്ന് മാസത്തിനകം പ്രഖ്യാപനം തള്ളിയില്ലെങ്കില് അത് അംഗീകരിച്ചതായി കണക്കാക്കും. ഓര്ഡിനന്സ് പ്രാബല്യത്തിലായതോടെ ലോകായുക്തയുടെ ഈ അധികാരമാണ് ഇല്ലാതായത്. ഇനി വിധി വന്ന് മൂന്നുമാസത്തിനുള്ളില് കുറ്റാരോപിതരുടെ ഹിയറിങ് നടത്തി സര്ക്കാരിന് ലോകായുക്തയുടെ തീരുമാനം തള്ളാം.
വിദേശയാത്രയ്ക്കു ശേഷം തിരിച്ചെത്തിയ മുഖ്യമന്ത്രി പിണറായി വിജയന് ഇന്നലെ രാജ്ഭവനിലെത്തി ഗവര്ണറെ കണ്ട് കാര്യങ്ങള് വിശദീകരിച്ചിരുന്നു. ലോകായുക്തയുടെ 14-ാം വകുപ്പ് ഭരണഘടന വിരുദ്ധമായതുകൊണ്ടാണ് ഭേദഗതി കൊണ്ടുവന്നതെന്ന് മുഖ്യമന്ത്രി ഇന്നലെ വിശദീകരിച്ചിരുന്നു. എ.ജിയുടെ നിയമോപദേശമുണ്ടെന്നും മുഖ്യമന്ത്രി ഗവര്ണറെ ബോധ്യപ്പെടുത്തി. മറ്റ് സംസ്ഥാനങ്ങളില് ലോകായുക്തക്ക് ഈ അധികാരമില്ലെന്നും മുഖ്യമന്ത്രി വിശദീകരിച്ചു. തന്റെ വിശദ പരിശോധനയിലും ഇക്കാര്യം ബോധ്യപ്പെട്ടെന്ന് ഗവര്ണറും വ്യക്തമാക്കിയിരുന്നു.
