കണ്ണൂര്: മുഖ്യമന്ത്രി പിണറായി വിജയന് എതിരെ വിമാനത്തില് പ്രതിഷേധിച്ച അധ്യാപകന് സസ്പെന്ഷന്. മുഖ്യമന്ത്രിക്ക് എതിരെ പ്രതിഷേധിച്ച യൂത്ത് കോണ്ഗ്രസ് പ്രവര്ത്തകരിലൊരാളായ മട്ടന്നൂര് യുപി സ്കൂളിലെ അധ്യാപകന്
ഫര്സീന് മജീദിനെയാണ് മാനേജ്മെന്റ സസ്പെന്ഡ് ചെയ്തത്. അധ്യാപകനെതിരെ പരാതിയുമായി രക്ഷിതാക്കൾ സ്കൂളിൽ എത്തിയതിനെ തുടര്ന്നാണ് നടപടി. അധ്യാപകനെ കുറിച്ച് അന്വേഷിക്കാന് വിദ്യാഭ്യാസ മന്ത്രി വി ശിവന്കുട്ടി നിര്ദേശം നല്കി.
മുഖ്യമന്ത്രി കണ്ണൂരില് നിന്നു തിരുവനന്തപുരത്തെത്തിയ ഇന്ഡിഗോ വിമാനത്തിലാണ് യൂത്ത് കോണ്ഗ്രസ് കണ്ണൂര് ജില്ലാ സെക്രട്ടറി ആര്.കെ.നവീന്കുമാര്, മട്ടന്നൂര് ബ്ലോക്ക് പ്രസിഡന്റ് ഫര്സീന് മജീദ് എന്നിവര് ‘മുഖ്യമന്ത്രി രാജിവയ്ക്കുക’ എന്ന മുദ്രാവാക്യമുയര്ത്തിയത്. ഇവര് മുഖ്യമന്ത്രിയെ ആക്രമിക്കാന് ശ്രമിച്ചെന്നാരോപിച്ച് പിഎയും ഗണ്മാനും നല്കിയ പരാതിയില് വധശ്രമത്തിന് പൊലീസ് കേസെടുത്തു. വധശ്രമം, ഔദ്യോഗിക ഡ്യൂട്ടി തടസ്സപ്പെടുത്തൽ, എയർ ക്രാഫ്റ്റ് സുരക്ഷയെ ബാധിക്കുന്ന അതിക്രമം എന്നീ വകുപ്പുകൾ ചുമത്തിയാണ് കേസെടുത്തിരിക്കുന്നത്.
സുരക്ഷാ ഉദ്യോഗസ്ഥര് ഇരുവരെയും വലിയതുറ പൊലീസിനു കൈമാറി. മര്ദനത്തില് പരുക്കേറ്റ ഇരുവരെയും മെഡിക്കല് കോളജ് ആശുപത്രിയില് പ്രവേശിപ്പിച്ചു.
വിമാനത്തില് 8 എ, 8 സി, 7 ഡി എന്നീ സീറ്റുകളില് യാത്ര ചെയ്തിരുന്നവരാണ് അതിക്രമം കാണിച്ചതെന്നാണ് എയര്പോര്ട്ട് മാനേജര് വിജിത്ത് പരാതി നല്കിയിട്ടുള്ളത്. കണ്ണൂരില് നിന്നുമെത്തിയ മൂന്ന് യാത്രക്കാര് അതിക്രമം കാണിച്ചുവെന്ന് കാണിച്ച് ഇന്ഡിഗോ ഗ്രൗണ്ട് ഹാന്ഡിലിംഗ് മാനേജരും പരാതി നല്കിയിട്ടുണ്ട്.
