ഉത്സവകാലത്തെ കമ്പോള ഇടപെടല് ശക്തമാക്കി ഗുണ നിലവാരമുള്ള ഭക്ഷ്യവസ്തുക്കള് ഉള്പ്പടെ നിത്യോപയോഗ സാധനങ്ങള് മിതമായ നിരക്കില് ലഭ്യമാക്കുന്നതിനും പൊതു വിപണി വില നിയന്ത്രിക്കുന്നതിനും സംസ്ഥാനത്തുടനീളം തിരഞ്ഞെടുക്കപ്പെട്ട സ്ഥലങ്ങളില് സപ്ലൈകോ ഓണം ജില്ലാ ഫെയറുകള് നടത്തും. സപ്ലൈകോ ഓണം മേളയുടെ സംസ്ഥാനതല ഉദ്ഘാടനം 18ന് വൈകുന്നേരം 3.30ന് തിരുവനന്തപുരം പുത്തരിക്കണ്ടം നായനാര് പാര്ക്കില് മുഖ്യമന്ത്രി പിണറായി വിജയന് നിര്വഹിക്കും. ഭക്ഷ്യ പൊതുവിതരണ മന്ത്രി ജി.ആര് അനില് അധ്യക്ഷത വഹിക്കും. ഗതാഗത മന്ത്രി ആന്റണി രാജു ആദ്യവില്പ്പന നടത്തും. പൊതു വിദ്യാഭ്യാസ, തൊഴില് മന്ത്രി വി. ശിവന്കുട്ടി ശബരി ഉത്പന്നങ്ങളുടെ റീബ്രാന്ഡിങ്ങും പുതിയ ശബരി ഉത്പന്നങ്ങളുടെ പരിചയപ്പെടുത്തലും നിര്വഹിക്കും. ശശി തരൂര് എം.പി, മേയര് ആര്യാ രാജേന്ദ്രന്, ഡെപ്യൂട്ടി മേയര് പി.കെ രാജു, എന്നിവര് പങ്കെടുക്കും.
സപ്ലൈകോ ഓണം ജില്ലാ ഫെയറുകളില് എല്ലാ നിത്യോപയോഗ സാധനങ്ങളും വിലക്കുറവില് ലഭ്യമാണ്. വിപണന കേന്ദ്രങ്ങളില് നിന്നും വാങ്ങുന്ന ഉല്പ്പന്നങ്ങള്ക്ക് 5 മുതല് 50 ശതമാനം വരെ വിലക്കുറവും വിവിധ ഉല്പ്പന്നങ്ങളുടെ കോംബോ ഓഫറും ലഭിക്കും. പുത്തരിക്കണ്ടം മൈതാനത്തെ ഓണം ഫെയര് ആഗസ്റ്റ് 28 വരെയുണ്ടാകും. താലൂക്ക് ഫെയറുകള് ആഗസ്റ്റ് 23 മുതല് ആഗസ്റ്റ് 28 വരെയും, ഓണം മാര്ക്കറ്റുകള്, ഓണം മിനി ഫെയറുകള് എന്നിവ ആഗസ്റ്റ് 23 മുതല് ആഗസ്റ്റ് 28 വരെയും വിപണന കേന്ദ്രങ്ങളോട് ചേര്ന്ന് നടക്കും. എല്ലാ താലൂക്ക് ഫെയറുകളും രാവിലെ 9 മുതല് രാത്രി 9 വരെയും മിനി ഫെയറുകള് രാവിലെ 10 മുതല് രാത്രി 8 വരെയും ഇടവേളയില്ലാതെ പ്രവര്ത്തിക്കും.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
