രാജ്യത്ത് ആദ്യമായി ഒരു സംസ്ഥാന സര്ക്കാരിന്റെ ഉടമസ്ഥതയിലുള്ള ഒടിടി പ്ലാറ്റ്ഫോം അവതരിപ്പിക്കാനൊരുങ്ങി കേരളം. സംസ്ഥാന സര്ക്കാരിന്റെ ഒടിടി പ്ലാറ്റ് ഫോം ആയ ‘സി സ്പേസ്’ മാര്ച്ച് ഏഴിന് രാവിലെ 9.30 ന് തിരുവനന്തപുരം കൈരളി തിയേറ്ററില് മുഖ്യമന്ത്രി പിണറായി വിജയന് ഉദ്ഘാടനം ചെയ്യും. സാംസ്കാരിക വകുപ്പ് മന്ത്രി സജി ചെറിയാന് അധ്യക്ഷത വഹിക്കും.
ഉള്ളടക്കത്തിലും പ്രചാരണത്തിലും ഒടിടി മേഖലയിലെ വര്ധിച്ചുവരുന്ന അസന്തുലിതാവസ്ഥകളോടും വെല്ലുവിളികളോടുമുള്ള പ്രതികരണമാണ് സി സ്പേസിലൂടെ സാധ്യമാക്കുന്നതെന്ന് പ്രശസ്ത ചലച്ചിത്ര സംവിധായകനും കേരള സംസ്ഥാന ചലച്ചിത്ര വികസന കോര്പ്പറേഷന് (കെ.എസ്.എഫ്.ഡി.സി) ചെയര്മാനുമായ ഷാജി എന്. കരുണ് വാര്ത്താസമ്മേളനത്തില് പറഞ്ഞു.
കെ.എസ്.എഫ്.ഡി.സിക്കാണ് സി സ്പേസിന്റെ നിര്വ്വഹണച്ചുമതല. സി സ്പേസിലേക്കുള്ള സിനിമകള് തെരഞ്ഞെടുക്കുന്നതിനും അംഗീകരിക്കുന്നതിനുമായി ചലച്ചിത്രപ്രവര്ത്തകരായ സന്തോഷ് ശിവന്, ശ്യാമപ്രസാദ്, സണ്ണി ജോസഫ്, ജിയോ ബേബി, എഴുത്തുകാരായ ഒ.വി ഉഷ, ബെന്യാമിന് എന്നിവരടങ്ങുന്ന 60 പേരുടെ ഒരു ക്യൂറേറ്റര് സമിതി കെ.എസ്.എഫ്.ഡി.സി. രൂപീകരിച്ചിട്ടുണ്ട്. സി സ്പേസിലേക്ക് സമര്പ്പിക്കുന്ന ഉള്ളടക്കങ്ങളുടെ കലാപരവും സാംസ്കാരികവുമായ മൂല്യം സമിതി വിലയിരുത്തും. ഇവര് ശുപാര്ശ ചെയ്യുന്ന സിനിമകള് മാത്രമേ പ്ലാറ്റ്ഫോമില് പ്രദര്ശിപ്പിക്കുകയുള്ളൂ.
സി സ്പേസിന്റെ ആദ്യ ഘട്ടത്തിലേക്ക് 42 സിനിമകള് ക്യൂറേറ്റര്മാര് തെരഞ്ഞെടുത്തതായി ഷാജി എന് കരുണ് പറഞ്ഞു. ദേശീയ-സംസ്ഥാന പുരസ്ക്കാരങ്ങള് നേടിയതോ പ്രശസ്ത ചലച്ചിത്രമേളകളില് പ്രദര്ശിപ്പിച്ചതോ ആയ സിനിമകളും ഇതിലുണ്ടാകും. നിരവധി പുരസ്കാരങ്ങള് നേടിയ ‘നിഷിദ്ധോ’, ‘ബി 32 മുതല് 44 വരെ’ എന്നീ സിനിമകള് സി സ്പേസ് വഴി പ്രീമിയര് ചെയ്യും.
ലാഭവിഹിതത്തിലെയും കാഴ്ചക്കാരുടെ എണ്ണത്തിലെയും സുതാര്യതയും അത്യാധുനിക സാങ്കേതികമികവുമാണ് സി സ്പേസിന്റെ മുഖമുദ്ര. കാണുന്ന സിനിമയ്ക്ക് മാത്രം പണം നല്കുക എന്ന വ്യവസ്ഥയില് പ്രവര്ത്തിക്കുന്ന സി സ്പേസില് 75 രൂപയ്ക്ക് ഒരു ഫീച്ചര് ഫിലിം കാണാനും ഷോര്ട്ട് ഫിലിമുകള് വളരെ കുറഞ്ഞ വിലയ്ക്ക് കാണാനും അവസരമുണ്ടാകും. ഈടാക്കുന്ന തുകയുടെ പകുതി തുക ഉള്ളടക്ക ദാതാവിന് ലഭിക്കും.
നിര്മ്മാതാക്കള് സിനിമകള് ഒടിടി പ്ലാറ്റ്ഫോമുകളില് നേരിട്ട് റിലീസ് ചെയ്യുന്നതു മൂലം തിയേറ്റര് ഉടമ സ്ഥര്ക്കും വിതരണക്കാര്ക്കും ലാഭം കുറയുന്നുവെന്ന ആശങ്ക നിലനില്ക്കുന്നുണ്ടെന്നും ഇത് ഉള്ക്കൊണ്ട് തിയേറ്ററുകളില് റിലീസ് ചെയ്ത സിനിമകള് മാത്രം പ്രദര്ശിപ്പിക്കാനാണ് സി സ്പേസ് തീ രുമാനിച്ചിട്ടുള്ളതെന്നും കെഎസ്എഫ്ഡിസി മാനേജിംഗ് ഡയറക്ടര് കെ.വി അബ്ദുള് മാലിക് പറഞ്ഞു.
ക്യൂറേറ്റര്മാര് നിര്ദേശിക്കുന്ന ഹ്രസ്വചിത്രങ്ങള്, ഡോക്യുമെന്ററികള്, പരീക്ഷണ സിനിമകള് എന്നിവ പ്ലാറ്റ്ഫോമില് ലഭ്യമാക്കും. സിനിമാ പ്രവര്ത്തകരുടെ ക്ഷേമത്തിനായി നിശ്ചിത തുക നീക്കിവെക്കുന്ന പദ്ധതിയും പരിഗണനയിലുണ്ട്. നിര്മ്മാതാക്കള്ക്ക് അവരുടെ സിനിമകള് കാണുന്ന പ്രേക്ഷകരുടെ പിന്തുണയിലൂടെ നിര്മ്മാണച്ചെലവ് തിരിച്ചുപിടിക്കാനുള്ള അവസരം നല്കിക്കൊണ്ട് ക്രൗഡ് ഫണ്ടിംഗില് ഒരു പുതിയ സമ്പ്രദായം ആരംഭിക്കാനും സി സ്പേസ് ഉദ്ദേശിക്കുന്നു.
ഉദ്ഘാടന ചടങ്ങില് മന്ത്രിമാരായ വി.ശിവന്കുട്ടി, ജി.ആര് അനില്, ആന്റണി രാജു എം.എല്.എ, തിരുവനന്തപുരം മേയര് ആര്യ രാജേന്ദ്രന്, കെ.എസ്.എഫ്.ഡി.സി. ചെയര്മാന് ഷാജി എന്. കരുണ്, സാംസ്കാരിക വകുപ്പ് സെക്രട്ടറി മിനി ആന്റണി, സാംസ്കാരിക വകുപ്പ് ഡയറക്ടര് എന്.മായ, കെ.എസ്.എഫ്.ഡി.സി എം.ഡി കെ.വി അബ്ദുള് മാലിക്, കലാ സാംസ്കാരിക മേഖലയിലെ മറ്റ് പ്രമുഖര് തുടങ്ങിയവര് പങ്കെടുക്കും.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
