2023-24 അക്കാദമിക വര്ഷത്തെ എസ്.എസ്.എല്.സി./ റ്റി.എച്ച്.എസ്.എസ്.എല്.സി./ എ.എച്ച്.എസ്.എല്.സി. ഫലപ്രഖ്യാപനം മെയ് 8 ന് 3.00 മണിക്ക് നടത്തുമെന്ന് വിദ്യാഭ്യാസമന്ത്രി വി ശിവന്കുട്ടി തിരുവനന്തപുരത്ത് പത്രസമ്മേളനത്തില് അറിയിച്ചു. കഴിഞ്ഞ വര്ഷം മെയ് 19 നാണ് ഫലപ്രഖ്യാപനം നടത്തിയത്. ഇത്തവണ പതിനൊന്ന് ദിവസം മുമ്പ് തന്നെ ഫലപ്രഖ്യാപനം നടത്തുകയാണ്. ഇക്കൊല്ലം എസ്.എസ്.എല്.സി. പരീക്ഷ എഴുതിയത് ആകെ നാല് ലക്ഷത്തി ഇരുപത്തി ഏഴായിരത്തി ഒരുന്നൂറ്റി അഞ്ച് (4,27,105) വിദ്യാര്ത്ഥികളാണ്. ഇതില് രണ്ട് ലക്ഷത്തി പതിനേഴായിരത്തി അഞ്ഞൂറ്റി ഇരുപത്തിയഞ്ച് (2,17,525) ആണ്കുട്ടികളും രണ്ട് ലക്ഷത്തി ഒമ്പതിനായിരത്തി അഞ്ഞൂറ്റി എണ്പത് (2,09,580) പെണ്കുട്ടികളും ഉള്പ്പെടുന്നു. സംസ്ഥാനത്തൊട്ടാകെ എഴുപത് ക്യാമ്പുകളിലായി പതിനായിരത്തി എണ്ണൂറ്റി അറുപത്തി മൂന്ന് (10,863) അധ്യാപകര് മൂല്യനിര്ണ്ണയ ക്യാമ്പില് പങ്കെടുത്തു. ഏപ്രില് 3 മുതല് 20 വരെ പതിനാല് ദിവസങ്ങളിലായി മൂല്യനിര്ണ്ണയം പൂര്ത്തിയാക്കി. ടാബുലേഷന്, ഗ്രേസ് മാര്ക്ക് എന്ട്രി, എന്നിവ പരീക്ഷാ ഭവനില് പൂര്ത്തിയാക്കി ഫലപ്രഖ്യാപനത്തിന് തയ്യാറായിക്കൊണ്ടിരിക്കുകയാണെന്നും മന്ത്രി പറഞ്ഞു.
ഈ അക്കാദമിക വര്ഷത്തെ രണ്ടാം വര്ഷ ഹയര് സെക്കണ്ടറി, വൊക്കേഷണല് ഹയര്സെക്കണ്ടറി പരീക്ഷാ ഫലപ്രഖ്യാപനം മെയ് 9 വ്യാഴാഴ്ച നടത്തും. കഴിഞ്ഞ വര്ഷം മെയ് 25 നാണ് ഫലപ്രഖ്യാപനം നടത്തിയത്. ഈ വര്ഷം മെയ് 10 നകം തന്നെ ഫലപ്രഖ്യാപനം നടത്താനായത് കൃത്യമായ ആസൂത്രണത്തിന്റെയും നിര്വഹണത്തിന്റെയും ഫലമായാണ്. ആകെ നാല് ലക്ഷത്തി നാല്പത്തിയൊന്നായിരത്തി ഒരുന്നൂറ്റി ഇരുപത് (4,41,120) വിദ്യാര്ത്ഥികളാണ് പരീക്ഷ എഴുതിയത്. ഇതില് രണ്ട് ലക്ഷത്തി ഇരുപത്തി മൂവായിരത്തി എഴുന്നൂറ്റി മുപ്പത്തിയാറ് (2,23,736) ആണ്കുട്ടികളും രണ്ട് ലക്ഷത്തി പതിനേഴായിരത്തി മുന്നൂറ്റി എണ്പത്തി നാല് (2,17,384) പെണ്കുട്ടികളും ഉള്പ്പെടുന്നു.
ഏപ്രില് 3 മുതല് 24-ാം തീയതി വരെയാണ് മൂല്യനിര്ണ്ണയം നടന്നത്. പ്ലസ് വണ്, പ്ലസ് ടു പരീക്ഷാ മൂല്യനിര്ണ്ണയത്തില് മൊത്തം എഴുപത്തി ഏഴ് ക്യാമ്പുകളിലായി ഇരുപത്തി അയ്യായിരത്തോളം അധ്യാപകര് പങ്കെടുത്തതായും മന്ത്രി പറഞ്ഞു.
വൊക്കേഷണല് ഹയര് സെക്കണ്ടറി റഗുലര് വിഭാഗത്തില് ഇരുപത്തി ഏഴായിരത്തി എഴുന്നൂറ്റി തൊണ്ണൂറ്റിയെട്ട് (27,798) പ്രൈവറ്റ് വിഭാഗത്തില് ആയിരത്തി അഞ്ഞൂറ്റി രണ്ട് (1,502) ഉള്പ്പെടെ ആകെ ഇരുപത്തിയൊമ്പതിനായിരത്തി മുന്നൂറ് (29,300) പേരാണ് രണ്ടാം വര്ഷ പരീക്ഷയ്ക്ക് രജിസ്റ്റര് ചെയ്തത്. ഇതില് പതിനെട്ടായിരത്തി ഇരുന്നൂറ്റി തൊണ്ണൂറ്റി ഏഴ് (18,297) ആണ്കുട്ടികളും പതിനൊന്നായിരത്തി മൂന്ന് (11,003) പെണ്കുട്ടികളും ഉള്പ്പെടുന്നു. എട്ട് ക്യാമ്പുകളിലായി രണ്ടായിരത്തി ഇരുന്നൂറോളം അധ്യാപകര് മൂല്യനിര്ണ്ണയ ക്യാമ്പില് പങ്കെടുത്തതായും മന്ത്രി അറിയിച്ചു.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
