തിരുവനന്തപുരം: എസ്എഫ്ഐ നടത്തിയ കരിങ്കൊടി പ്രതിഷേധത്തിനിടെ കാര് നിര്ത്തി നടുറോഡിലിറങ്ങി ഗവര്ണര് ആരിഫ് മുഹമ്മദ് ഖാന്. തിരുവനന്തപുരം പേട്ട പള്ളിമുക്കിലാണ് അസാധാരണ സംഭവങ്ങള് നടന്നത്. തനിക്ക് മതിയായ സുരക്ഷയൊരുക്കിയില്ലെന്ന് സര്ക്കാരിനെതിരെ വിമര്ശനം ഉന്നയിച്ച ഗവര്ണര്, ‘മുതിര്ന്ന പൊലീസ് ഉദ്യോഗസ്ഥര് എവിടെ? ഈ ഗുണ്ടകളാണോ ഭരിക്കുന്നത്. ക്രിമിനലുകള്. മുഖ്യമന്ത്രിയുടെ പാര്ട്ടിയാണ് ഗുഢാലോചനയ്ക്ക് പിന്നില്. കാര് ആക്രമിക്കുന്നതാണോ ജനാധിപത്യം. അവര് മുഖ്യമന്ത്രിയുടെ കാര് ആക്രമിക്കുമോ. കണ്ണൂരില് ചെയ്തതുപോലെ എന്നെ ശാരീരികമായി ആക്രമിക്കാന് മുഖ്യമന്ത്രി ഗൂഢാലോചന നടത്തിയതാണ് ഈ പ്രതിഷേധം. മുഖ്യമന്ത്രിയുടെ നിര്ദേശ പ്രകാരമാണിത്. ക്രിമിനലുകളെ വെച്ചുപൊറുക്കില്ല. ജനങ്ങള്ക്ക് എന്തു സുരക്ഷയാണുള്ളത്. റോഡ് ഭരിക്കാന് ഒരു ക്രിമിനലുകളെയും ഞാന് അനുവദിക്കില്ല.’ ഗവര്ണര് രൂക്ഷഭാഷയില് പ്രതികരിച്ചു.
‘ആര്എസ്എസ് ഗവര്ണര് ഗോബാക്ക്’ മുദ്രാവാക്യം ഉയര്ത്തിയെത്തിയ എസ്എഫ്ഐ പ്രവര്ത്തകര് ഗവര്ണര് ആരിഫ് മുഹമ്മദ് ഖാനെതിരെ കരിങ്കൊടി കാണിക്കുകയായിരുന്നു. വിമാനത്താവളത്തിലേക്ക് പോകുന്ന വഴി പേട്ട ജംഗ്ഷന് സമീപം പൊലീസ് സ്റ്റേഷന് എതിര്വശത്താണ് പ്രതിഷേധം സംഘടിപ്പിച്ചത്. എസ്എഫ്ഐ ജില്ലാ കമ്മിറ്റിയുടെ നേതൃത്വത്തിലാണ് പ്രതിഷേധം. സര്വ്വകലാശാല കാവിവല്ക്കരിക്കുന്നുവെന്നാരോപിച്ച് കഴിഞ്ഞ ദിവസവും ഗവര്ണര്ക്കെതിരെ എസ്എഫ്ഐ പ്രതിഷേധിച്ചിരുന്നു.
മലബാറി ന്യൂസ് ഓണ്ലൈന് വാര്ത്തകള് വാട്സ്ആപ്പ് ഗ്രൂപ്പുകളിലും ലഭിക്കും. വാട്സ്ആപ്പ് ഗ്രൂപ്പില് അംഗമാവാന് ഇവിടെ ക്ലിക്ക് ചെയ്യു
