പാലക്കാട്: കണ്ണാടി ഹയര്സെക്കണ്ടറി സ്കൂളില് ഒന്പതാം ക്ലാസ് വിദ്യാര്ത്ഥി അര്ജുന് ജീവനൊടുക്കിയ സംഭവത്തില് നടപടിയെടുത്ത് സ്കൂള് മാനേജ്മെന്റ്. ആരോപണവിധേയയായ ക്ലാസ് ടീച്ചര് ആശയെയും പ്രധാനാധ്യാപിക ലിസിയെയും സസ്പെന്ഡ് ചെയ്തു. പത്ത് ദിവസത്തേക്കാണ് സസ്പെന്ഷന്.
വെള്ളിയാഴ്ച വൈകിട്ടാണ് അര്ജുന്റെ മരണത്തിലേക്ക് നയിച്ചതെന്ന് ആരോപിക്കുന്ന സംഭവം ഉണ്ടായത് . അര്ജുന് ഉള്പ്പെടെയുള്ള നാല് വിദ്യാര്ത്ഥികള് ഇന്സ്റ്റഗ്രാമില് സന്ദേശം അയച്ചത് ഒരു രക്ഷിതാവ് അറിയുകയും ഇത് സ്കൂളില് അറിയിക്കുകയുമായിരുന്നു. തുടര്ന്ന് മുഴുവന് രക്ഷിതാക്കളെയും സ്കൂളിലേക്ക് വിളിപ്പിക്കുകയും കുട്ടികളെ ശാസിച്ച് വിടുകയുമായിരുന്നു. പിന്നീട് ക്ലാസ് അധ്യാപിക സമാന വിഷയത്തില് ഇടപെടുകയും ഭീഷണിപ്പെടുത്തിയെന്നുമാണ് വിദ്യാര്ത്ഥികളുടെ ആരോപണം. ക്ലാസിലെ അധ്യാപിക അര്ജുനെ നിരന്തരം മാനസികമായി പീഡിപ്പിച്ചുവെന്ന് അര്ജുന്റെ കുടുംബവും വിദ്യാര്ത്ഥികളും ആരോപിച്ചിരുന്നു.
കഴിഞ്ഞ ദിവസം രാത്രിയാണ് വീടിനകത്ത് തൂങ്ങിമരിച്ച നിലയില് അര്ജുനെ കണ്ടെത്തിയത്.
