മുംബൈ: 2025 ലെ എം3എം ഹുറുണ് ഇന്ത്യ റിച്ച് ലിസ്റ്റിന്റെ 14-ാമത് പതിപ്പ് പ്രകാരം മുകേഷ് അംബാനിയും കുടുംബവും വീണ്ടും ഇന്ത്യയിലെ ഏറ്റവും സമ്പന്നര്. 9.55 ലക്ഷം കോടി രൂപയുടെ ആസ്തിയുമായാണ് അംബാനി കുടുംബം പട്ടികയില് ഒന്നാമതെത്തിയത്. ഇന്ത്യയിലെ ശതകോടീശ്വരന്മാരുടെ പട്ടികയില് ഏറ്റവും ഉയര്ന്ന സ്ഥാനത്തേക്കുള്ള മത്സരം വ്യക്തമാക്കി 8.15 ലക്ഷം കോടി രൂപയുടെ ആസ്തിയുമായി ഗൗതം അദാനിയും കുടുംബവും തൊട്ടുപിന്നിലുണ്ട്.
ശതകോടീശ്വര ക്ലബ്ബിലെത്തി ബോളിവുഡ് താരം ഷാരൂഖ് ഖാന്.12,490 കോടി രൂപയുടെ ആസ്തിയുമായി ബോളിവുഡ് സൂപ്പര്സ്റ്റാര് ഷാരൂഖ് ഖാനും ആദ്യമായി ക്ലബ്ബില് ചേര്ന്നു. ഹുറുണ് റിച്ച് ലിസ്റ്റ് 2025 ല് ബോളിവുഡ് താരങ്ങളില് ഒന്നാം സ്ഥാനത്താണ് അദ്ദേഹം. 12,490 കോടി രൂപയാണ് ഷാരൂഖ് ഖാന്റെ ആസ്തി. ഷാരൂഖ് ഖാനും ഭാര്യ ഗൗരി ഖാനും ചേര്ന്ന് 2002 ല് സ്ഥാപിച്ച ഒരു ഇന്ത്യന് ബഹുരാഷ്ട്ര കമ്പനിയായ റെഡ് ചില്ലീസ് എന്റര്ടൈന്മെന്റില് നിന്നുള്ള വരുമാനത്തില് നിന്നാണ് ഷാരൂഖ് ഖാന്റെ സമ്പത്ത് വന്തോതില് ഉയര്ന്നത്.
സമ്പത്തിന്റെ മറ്റൊരു വാക്കാണ് ഷാരൂഖ് ഖാന്റെ വീട്. മന്നത്ത് എന്ന വസതിക്ക് 200 കോടിയിലധികം മൂല്യമുണ്ട്. കൂടാതെ, ലണ്ടനിലെ പാര്ക്ക് ലെയ്നില് ഒരു ആഡംബര അപ്പാര്ട്ട്മെന്റ്, ഇംഗ്ലണ്ടില് ഒരു അവധിക്കാല വസതി, ബെവര്ലി ഹില്സില് ഒരു വില്ല, ഡല്ഹിയില് പ്രോപ്പര്ട്ടികള്, അലിബാഗില് ഒരു ഫാംഹൗസ്, ദുബായില് ഒരു വസതി എന്നിവ അദ്ദേഹത്തിന് സ്വന്തമായുണ്ട്.
മാത്രമല്ല, ബോളിവുഡിലെ ഏറ്റവും ആഡംബര കാര് ശേഖരങ്ങളിലൊന്നാണ് ഷാരൂഖിന്റെ ഗാരേജ്. ബിഎംഡബ്ല്യു, മെഴ്സിഡസ് ബെന്സ്, റോള്സ് റോയ്സ്, ഓഡി, റേഞ്ച് റോവര്, ബുഗാട്ടി തുടങ്ങിയ ആഡംബര ബ്രാന്ഡുകളുണ്ട് അദ്ദേഹത്തിന്റെ ഗാരേജില്. 12 കോടി രൂപ വിലമതിക്കുന്ന ബുഗാട്ടി വെയ്റോണും, 9.5 കോടി രൂപ വിലമതിക്കുന്ന ഒരു റോള്സ് റോയ്സ് ഫാന്റവും, 3.29 കോടി രൂപ വിലയുള്ള ബെന്റ്ലി കോണ്ടിനെന്റല് ജിടിയുമാണ് അദ്ദേഹത്തിന്റെ ഗാരേജിിലെ അറ്റവും വിലപിടിപ്പുള്ളവ.
ഹുറുണ് പട്ടികയില് ഷാരൂഖ് ഖാന് പിന്നിലായി ജൂഹി ചൗളയാണ്. അവരുടെ ആസ്തി 7,790 കോടി രൂപയാണ്. നൈറ്റ് റൈഡേഴ്സ് സ്പോര്ട്സിലെ ഓഹരി പങ്കാളിത്തമാണ് ഇതിന് പ്രധാന കാരണം. 2,160 കോടി രൂപയുമായി ഹൃത്വിക് റോഷന് മൂന്നാം സ്ഥാനത്താണ്. ഫിറ്റ്നസ്, ലൈഫ്സ്റ്റൈല് ബ്രാന്ഡായ എച്ച്ആര്എക്സിന്റെ പങ്കാളിത്തമാണ് ഹൃത്വിക് റോഷന്റെ സമ്പാദ്യം. 1,880 കോടി രൂപയുമായി കരണ് ജോഹറും 1,630 കോടി രൂപയുമായി അമിതാഭ് ബച്ചനും കുടുംബവും ആദ്യ അഞ്ച് സ്ഥാനങ്ങളില് ഇടം നേടി.
2.84 ലക്ഷം കോടി രൂപയുടെ ആസ്തിയുമായി റോഷ്നി നാടാര് മല്ഹോത്രയും കുടുംബവും ആദ്യമായി ആദ്യ മൂന്ന് സ്ഥാനങ്ങളില് ഇടം നേടി. ഇതോടെ അവര് ഇന്ത്യയിലെ ഏറ്റവും ധനികയായ വനിതയായി മാറി.
ഇന്ത്യയിലെ ശതകോടീശ്വരന്മാരുടെ എണ്ണത്തില് ദ്രുതഗതിയിലുള്ള വളര്ച്ചയും റിപ്പോര്ട്ട് കാണിക്കുന്നു. ആകെ ശതകോടീശ്വരന്മാരുടെ എണ്ണം ഇപ്പോള് 350 കവിഞ്ഞു. 13 വര്ഷം മുമ്പ് പട്ടിക ആരംഭിച്ചതിനുശേഷം ആറ് മടങ്ങ് വര്ധനയാണ് കാണിക്കുന്നത്. അവരുടെ സമ്പത്ത് 167 ലക്ഷം കോടി രൂപയാണ്, ഇത് ഇന്ത്യയുടെ ജിഡിപിയുടെ പകുതിയോളം വരും.
യുവ സമ്പത്ത് സൃഷ്ടിക്കുന്നവര് തരംഗമായി മാറുകയാണ്. പെര്പ്ലെക്സിറ്റിയുടെ സ്ഥാപകനായ 31 കാരനായ അരവിന്ദ് ശ്രീനിവാസ് 21,190 കോടി രൂപയുമായി ഇന്ത്യയിലെ ഏറ്റവും പ്രായം കുറഞ്ഞ കോടീശ്വരനായി.
ആസ്തിയുടെ കാര്യത്തില് നീരജ് ബജാജും കുടുംബവും ഏറ്റവും വലിയ കുതിച്ചുചാട്ടം രേഖപ്പെടുത്തി. ആസ്തി 69,875 കോടി രൂപ കൂടി കൂട്ടിച്ചേര്ത്തുകൊണ്ട് 2.33 ലക്ഷം കോടി രൂപയിലെത്തി.
ഇന്ത്യയിലെ ഏറ്റവും സമ്പന്നരായ വ്യക്തികളില് 451 പേര് താമസിക്കുന്ന മുംബൈയാണ് ഇപ്പോഴും മുന്നില്. തൊട്ടുപിന്നില് 223 പേരുമായി ന്യൂഡല്ഹിയും 116 പേരുമായി ബെംഗളൂരുവുമാണ്.
മേഖലകളുടെ കാര്യത്തില്, 137 എന്ട്രികളുമായി ഫാര്മസ്യൂട്ടിക്കല്സ് ആധിപത്യം പുലര്ത്തുന്നു, അതേസമയം വ്യാവസായിക ഉല്പ്പന്നങ്ങള് (132), കെമിക്കല്സ് & പെട്രോകെമിക്കല്സ് (125) എന്നിവയാണ് തൊട്ടുപിന്നില്.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ
ലിങ്കില് ക്ലിക്ക് ചെയ്യു
