HIGHLIGHTS : Moment Priya's release; Central government says no diplomatic intervention
യെമനില് വധശിക്ഷയ്ക്ക് വിധിക്കപ്പെട്ട് കഴിയുന്ന നിമിഷ പ്രിയയുടെ മോചനത്തിനായി നയതന്ത്ര ഇടപെടല് നടത്താനാവില്ലെന്ന് കേന്ദ്രസര്ക്കാര്. കൊല്ലപ്പെട്ടയാളുടെ കുടുംബത്തിന് ബ്ലഡ് മണി നല്കി കേസ് ഒത്തുതീര്പ്പാക്കാനുള്ള ചര്ച്ചകളിലും നേരിട്ട് പങ്കെടുക്കാനാവില്ലെന്ന് കേന്ദ്രസര്ക്കാര് വ്യക്തമാക്കി.
അതേസമയം യെമന് സുപ്രീംകോടതിയില് അപ്പീല് നല്കാന് നിമിഷ പ്രിയയുടെ ബന്ധുക്കള്ക്ക് സഹായം ലഭ്യമാക്കുമെന്നും ബന്ധുക്കള്ക്ക് അടക്കം യെമനിലേക്ക് യാത്രയ്ക്ക് സൗകര്യമൊരുക്കുമെന്നുമുള്ള മുന്നിലപാട് കേന്ദ്രസര്ക്കാര് ആവര്ത്തിച്ചു. ബ്ലഡ് മണി യെമന് നിയമസംവിധാനത്തിലെ സാധ്യതയാണെന്നും, ഇടപെടുന്നതില് കേന്ദ്രസര്ക്കാരിന് മുന്നില് തടസമില്ലെന്നും ഹര്ജിയില് പറയുന്നു.
2017 ജൂലൈ 25 നാണ് നിമിഷപ്രിയ യെമന്കാരനായ തലാല് അബ്ദുമഹ്ദിയെ കൊലപ്പെടുത്തി വാട്ടര് ടാങ്കില് ഒളിപ്പിച്ചത്. തലാലിനൊപ്പം ക്ലിനിക് നടത്തുകയായിരുന്നു നിമിഷ. സ്വന്തമായി ക്ലിനിക് തുടങ്ങാന് സഹായ വാഗ്ദാനവുമായി വന്ന യെമന് പൗരന് പാസ്പോര്ട്ട് പിടിച്ചെടുത്ത് നടത്തിയ ക്രൂര പീഡനമാണ് കൊലപാതകത്തിലേക്ക് നയിച്ചത് എന്നാണ് നിമിഷയുടെ വാദം.