കല്പ്പറ്റ: വയനാട് മുണ്ടക്കൈയിലുണ്ടായ മണ്ണിടിച്ചില് ദുരന്തത്തില് 222 പേരുടെ മൃതദേഹങ്ങള് കണ്ടെത്തി. 225 പേരെ കാണാനില്ലെന്നാണ് ഒടുവില് ലഭിക്കുന്ന വിവരം. വയനാട് മുണ്ടക്കൈയിലുണ്ടായ മണ്ണിടിച്ചില് ദുരന്തം അവലോകനം ചെയ്യാന് മുഖ്യമന്ത്രി പിണറായി വിജയന് വിളിച്ച യോഗത്തില്, മുണ്ടക്കൈ പൂര്ണ്ണമായും തകര്ന്നെന്നാണ് വിലയിരുത്തല്. മണ്ണിന് അടിയില് കുടുങ്ങിക്കിടക്കുന്നവരെ കണ്ടെത്തണമെങ്കില് കൂടുതല് ഉപകരണങ്ങള് എത്തിക്കണമെന്നും അവലോകന യോഗം വിലയിരുത്തി. ദുരന്തഭൂമിയില് രക്ഷാപ്രവര്ത്തനം അതീവ ദുഷ്കരമാണ്.
വയനാട്ടിലെ ദുരന്ത മുഖത്ത് രക്ഷാപ്രവര്ത്തനം തടസപ്പെട്ടു. ചൂരല് മലയില് കണ്ണാടിപ്പുഴയില് അതിശക്തമായ മഴയെ തുടര്ന്ന് കനത്ത മലവെള്ളപ്പാച്ചിലാണ് തിരിച്ചടിയായത്. നിര്ത്താതെ പെയ്യുന്ന പെരുമഴയാണ് ചൂരല് മഴയില്. പുഴയില് ഉരുള്പൊട്ടിയതിന് സമാനമായ നിലയിലാണ് മലവെള്ളം കുതിച്ചൊഴുകുന്നത്. അപായ സാധ്യത മുന്നില് കണ്ട് രക്ഷാപ്രവര്ത്തനം താത്കാലികമായി നിര്ത്തി. സ്ഥലത്ത് സൈന്യത്തിന്റെ താത്കാലിക പാലം നിര്മ്മാണവും മുടങ്ങിയിട്ടുണ്ട്.
അതേസമയം, ചൂരല്മലയില് ബെയ്ലി പാലത്തിന്റെ നിര്മ്മാണം അതിവേഗം പുരോഗമിക്കുകയാണ്. സൈന്യമാണ് ബെയ്ലി പാലം നിര്മ്മിക്കുന്നത്. പാലം നിര്മ്മാണം പൂര്ത്തിയാകുന്നതോടെ മുണ്ടക്കൈ കേന്ദ്രീകരിച്ചുള്ള രക്ഷാപ്രവര്ത്തനം ദ്രുതഗതിയിലാകും.
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ലിങ്കില് ക്ലിക്ക് ചെയ്യു
