ലക്ഷദ്വീപിലെ സ്കൂള് കുട്ടികള്ക്കുള്ള ഉച്ച ഭക്ഷണത്തില് മാംസാഹാരം തുടരാമെന്ന് സുപ്രിംകോടതിയുടെ ഇടക്കാല ഉത്തരവ്. ഡയറി ഫാം പ്രവര്ത്തിക്കാനും സുപ്രിംകോടതി അനുമതി നല്കി. അഡ്മിനിസ്ട്രേറ്റര് ഉള്പ്പെടെയുള്ള എതിര് കക്ഷികള്ക്ക് കോടതി നോട്ടിസ് നല്കി.
ലക്ഷദ്വീപിലെ ഭരണപരിഷ്കാരം സംബന്ധിച്ച കേസിലാണ് ഉത്തരവ്. ജസ്റ്റിസ് ഇന്ദിര ബാനര്ജിയുടെ അധ്യക്ഷതയിലുള്ള ബെഞ്ചാണ് കേസ് പരിഗണിച്ചത്. ലക്ഷദ്വീപിലെ ഭരണപരിഷ്കാരത്തിന്റെ ഭാഗമായി സ്കൂള് മെനുവില് നിന്ന് മാംസാഹാരം നീക്കിയിരുന്നു. ഇതിനെതിരെയാണ് ലക്ഷദ്വീപ് സ്വദേശി ഹര്ജി നല്കിയത്. ഈ ഹര്ജി പരിഗണിച്ചാണ് ജസ്റ്റിസുമാരായ ഇന്ദിര ബാനര്ജി, എ എസ് ബൊപ്പണ്ണ എന്നിവരടങ്ങിയ ബെഞ്ച് 2021 ജൂണ് 22 ന് കേരള ഹൈക്കോടതി പുറപ്പടുവിച്ച ഇടക്കാല ഉത്തരവ് ഇനിയൊരു ഉത്തരവ് ഉണ്ടാകുന്നത് വരെ തുടരാന് നിര്ദേശിച്ചത്.
ഭരണ പരിഷ്കാരങ്ങള് സ്റ്റേ ചെയ്തുകൊണ്ടാണ് കേരള ഹൈക്കോടതി ഇടക്കാല ഉത്തരവ് ഇറക്കിയിരുന്നത്. ഇനി ഒരു ഉത്തരവ് ഉണ്ടാകുന്നത് വരെ സ്കൂള് മെനുവില് നിന്ന് മാംസാഹാരം നീക്കം ചെയ്യേണ്ടതില്ലെന്നും സുപ്രിംകോടതി ഉത്തരവിട്ടു.
