HIGHLIGHTS : Kodiyeri's funeral was held at Payyambalam with full official honours
കണ്ണൂര്: സിപിഎം നേതാവ് കോടിയേരി ബാലകൃഷ്ണന് കണ്ണീരോടെ യാത്രാമൊഴിയേകി കേരളം. സംസ്ക്കാരം പൂര്ണ്ണ ബഹുമതികളോടെ പയ്യാമ്പലത്ത് നടന്നു. ഇ കെ നായനാരുടെയും ചടയന് ഗോവിന്ദന്റെയും സ്മൃതി കുടീരങ്ങള്ക്ക് നടുവിലാണ് കോടിയേരിക്ക് അന്ത്യനിദ്ര ഒരുക്കിയിരിക്കുന്നത്. പ്രവര്ത്തകരുടെ മുദ്രാവാക്യം വിളികളാല് പയ്യാമ്പലം ബീച്ച് മുഖരിതമായിരുന്നു.
മുഖ്യമന്ത്രിയുടെ നേതൃത്വത്തില് എം എ ബേബി, എം വി ഗോവിന്ദന്, എം വിജയരാജന്, വിജയരാഘവന്, കെ കെ ശൈലജ, പി കെ ശ്രീമതി അടക്കമുളള മുതിര്ന്ന നേതാക്കള് വിലാപയാത്രയെ അനുഗമിച്ചു. മുഖ്യമന്ത്രിയും യെച്ചൂരിയും കോടിയേരിയുടെ ഭൗതികദേഹം വിലാപയാത്രയില് ചുമലിലേറ്റി.
തങ്ങളുടെ പ്രിയപ്പെട്ട നേതാവിനെ ഒരു നോക്ക് കാണാനും അന്തിമോപചാരം അര്പ്പിക്കാനുമായി ജനസാഗരമാണ് തലശ്ശേരി ടൗണ് ഹാളിലും കണ്ണൂരിലെ വീട്ടിലും ജില്ലാകമ്മിറ്റി ഓഫീസിലും എത്തിച്ചേര്ന്നിരുന്നത്. ഇന്നലെ എട്ട് മണിക്കൂറോളം തലശ്ശേരി ടൗണ് ഹാളിലും പിന്നീട് കുടുംബ വീട്ടിലും ഇന്ന് രാവിലെ മുതല് കണ്ണൂര് ജില്ലാക്കമ്മറ്റി ഓഫീസിലും പൊതുദര്ശനത്തിന് വെച്ചിരുന്നു.
സിപിഎം ജനറല് സെക്രട്ടറി സീതാറാം യെച്ചൂരി, പ്രകാശ് കാരാട്ട് അടക്കമുള്ള ദേശീയ നേതാക്കളും, ഗവര്ണര് ആരിഫ് മുഹമ്മദ് ഖാന്, മന്ത്രിമാരും പ്രതിപക്ഷ നേതാവും പ്രതിപക്ഷ നിരയിലെ നേതാക്കളും പ്രവസായ പ്രമുഖരും മതമേലധ്യക്ഷന്മാരും സാംസ്കാരിക നായകരുമടക്കം നിരവധിപ്പേര് കണ്ണൂരിലെത്തി കോടിയേരിക്ക് അന്തിമോപചാരം അര്പ്പിച്ചു. ഭാര്യ വിനോദിനിയും മക്കളും പൊട്ടിക്കരഞ്ഞു കൊണ്ടാണ് വീട്ടില് നിന്ന് കോടിയേരിക്ക് അവസാന യാത്രമൊഴിയേകിയത്. ഈങ്ങയില് പീടികയിലെ വീട്ടില് നിന്ന് കണ്ണൂരിലേയ്ക്കുള്ള വിലാപയാത്രയില് വഴിക്ക് ഇരുവശവും അന്ത്യാഭിവാദ്യവുമായി ജനം തടിച്ചുകൂടിയിരുന്നു.