HIGHLIGHTS : Kidney transplant patient dies due to delay in surgery at Thiruvananthapuram Medical College; Minister Veena George has ordered an inquiry
തിരുവനന്തപുരം: മെഡിക്കല് കോളേജില് അവയവം മാറ്റിവയ്ക്കല് ശസ്ത്രക്രിയ വൈകിയെന്ന വാര്ത്തയുടെ അടിസ്ഥാനത്തില് ആരോഗ്യ വകുപ്പ് മന്ത്രി വീണാ ജോര്ജ് അന്വേഷണത്തിന് ഉത്തരവിട്ടു. അടിയന്തരമായി അന്വേഷിച്ച് റിപ്പോര്ട്ട് നല്കാന് മന്ത്രി ആരോഗ്യ വകുപ്പ് അഡീഷണല് ചീഫ് സെക്രട്ടറിക്ക് നിര്ദേശം നല്കി. വീഴ്ച വരുത്തിയവര്ക്കെതിരെ കര്ശന നടപടി സ്വീകരിക്കും. സംഭവവുമായി ബന്ധപ്പെട്ട് ഉന്നതതല യോഗം അടിയന്തരമായി വിളിച്ചു ചേര്ക്കുന്നതാണെന്നും മന്ത്രി വ്യക്തമാക്കി.
തിരുവനന്തപുരം മെഡിക്കല് കോളജ് ആശുപത്രിയില് വൃക്ക മാറ്റിവച്ച രോഗി മരിച്ചു. ഇന്നലെ രാജഗിരി ആശുപത്രിയില് നിന്നുമെത്തിച്ച വൃക്ക മാറ്റിവച്ചയാളാണ് മരിച്ചത്. പൊലീസ് അകമ്പടിയോടെ വൃക്ക എത്തിച്ചുവെങ്കിലും ശസ്ത്രക്രിയയ്ക്ക് ആവശ്യമായ മുന്നൊരുക്കങ്ങള് നടത്താത്തതിനാല് ശസ്ത്രക്രിയ നാല് മണിക്കൂറോളം വൈകുകയായിരുന്നു.
എറണാകുളം രാജഗിരി ആശുപത്രിയില് ചികിത്സയിലുണ്ടായിരുന്ന മസ്തിഷ്ക മരണം സംഭവിച്ച 34 കാരന്റെ വൃക്കയാണ് തിരുവനന്തപുരം മെഡിക്കല് കോളജിലേക്ക് കൊണ്ടുവന്നത്. മൂന്ന് മണിക്കൂറുകൊണ്ട് എറണാകുളത്ത് നിന്ന് മാറ്റിവെക്കേണ്ട വൃക്കയുമായി ആംബുലന്സ് മെഡിക്കല് കോളജിലെത്തി. എന്നാല് മണിക്കൂര് കഴിഞ്ഞാണ് ശസ്ത്രക്രിയ തുടങ്ങിയത്.
അതേസമയം കിഡ്നിമാറ്റിവെക്കല് ശസ്ത്രക്രിയയ്ക്ക് മുമ്പ് രോഗിക്ക് ഡയാലിസിസ് നടത്തണമെന്നും അതിനെ തുടര്ന്നുണ്ടായ താമസമാണ് ശസ്ത്രക്രിയ വൈകാന് ഇടയായതെന്നും ആശുപത്രി അധികൃതര് പറയുന്നു.