ഡല്ഹി: ജമ്മുകശ്മീരിലെ പഹല്ഗാമിലുണ്ടായ ഭീകരാക്രമണത്തില് കൊല്ലപ്പെട്ടവരുടെ കുടുംബങ്ങള്ക്ക് നീതി ഉറപ്പാക്കുമെന്ന് പ്രധാനമന്ത്രി നരേന്ദ്രമോദി. പ്രതിവാര റേഡിയോ സംഭാഷണ പരിപാടിയായ മന് കി ബാത്തില് സംസാരിക്കുകയായിരുന്നു പ്രധാനമന്ത്രി.ഭീകരവാദത്തിനെതിരെ രാജ്യം ഒറ്റക്കെട്ടാണെന്നും ലോകരാജ്യങ്ങളുടെയെല്ലാം പിന്തുണ ഇന്ത്യക്കുണ്ടെന്നും പ്രധാനമന്ത്രി പറഞ്ഞു.
ആക്രമണത്തിന് ഗൂഢാലോചന നടത്തിയവര്ക്കും കുറ്റവാളികള്ക്കും ശക്തമായ തിരിച്ചടി തന്നെ നല്കുമെന്നും പ്രധാനമന്ത്രി വ്യക്തമാക്കി. മന് കി ബാത് പോഡ്കാസ്റ്റിന്റെ ഏറ്റവും പുതിയ എപ്പിസോഡിലായിരുന്നു പ്രധാനമന്ത്രിയുടെ പ്രതികരണം.
‘ജമ്മുകശ്മീര് ഉണര്ന്നുവരികയായിരുന്നു. ജനാധിപത്യം ശക്തിപ്പെട്ടു. വിനോദസഞ്ചാരികളുടെ എണ്ണം റെക്കോര്ഡ് വേഗത്തില് വര്ധിച്ചു, ജനങ്ങളുടെ വരുമാനം കൂടി, ജനജീവിതം മെച്ചപ്പെട്ടു, യുവാക്കള്ക്ക് പുതിയ അവസരങ്ങള് ലഭിച്ചു. അത് ജമ്മുകശ്മീരിന്റെ ശത്രുക്കള്ക്ക് ഇഷ്ടമായില്ല. പഹല്ഗാമിലെ ഭീകരാക്രമണം ഭീകരതയ്ക്ക് സ്പോണ്സര് ചെയ്യുന്നവരുടെ നിരാശയും ഭീരുത്വവുമാണ് വെളിവാക്കുന്നത്. ഇതിനു പിന്നില് പ്രവര്ത്തിച്ചവര്ക്ക് കടുത്ത മറുപടി തന്നെ നല്കും. പഹല്ഗാമില് കൊല്ലപ്പെട്ടവരുടെ കുടുംബങ്ങള്ക്ക് നീതി ഉറപ്പാക്കും’- നരേന്ദ്രമോദി പറഞ്ഞു.
പഹല്ഗാമിലെ ബൈസരണ്വാലിയില് ഏപ്രില് 22-നാണ് ഭീകരാക്രമണമുണ്ടായത്. ഭീകരാക്രമണത്തില് 26 പേരാണ് പഹല്ഗാം കൊല്ലപ്പെട്ടത്.
