യുഎസ് – ഇസ്രയേല് സംയുക്ത ആക്രമണത്തില് ഇറാന്റെ പരമോന്നത നേതാവ് ആയത്തുല്ല അലി ഖമേനി കൊല്ലപ്പെട്ടെന്ന റിപ്പോർട്ട് ഇറാന് മാധ്യമങ്ങൾ സ്ഥിരീകരിച്ചു. ഖമേനി കൊല്ലപ്പെട്ടന്ന് നേരത്തെ യുഎസ് പ്രസിഡന്റ് ഡോണള്ഡ് ട്രംപും ഇസ്രയേല് പ്രധാനമന്ത്രി നെതന്യൂഹുവും അവകാശപ്പെട്ടിരുന്നു. എന്നാല് ഇറാന് ഈ വാദം തള്ളിയിരുന്നു. പിന്നാലെയാണ് ഇറാൻ മാധ്യമങ്ങളുടെ സ്ഥിരികരണം.
യുഎസ് – ഇസ്രായേല് ഇന്റലിജന്സിനെ മറികടക്കാന് ഖമേനയിക്ക് കഴിഞ്ഞില്ലെന്ന് ട്രംപ് പറഞ്ഞു. ഖമേനിയെ കൂടാതെ ഇറാനിലെ സുപ്രധാന നേതാക്കളെയും വധിച്ചെന്നായിരുന്നു ട്രംപിന്റെ അവകാശവാദം. സമൂഹമാധ്യമമായ ട്രൂത്ത് സോഷ്യലിലാണ് ഖമേനയി കൊല്ലപ്പെട്ടെന്ന് ട്രംപ് കുറിച്ചത്. എന്നാല് ട്രംപിന്റെ അവകാശവാദം ഇറാന് തള്ളി. ഇറാന് പരമോന്നത നേതാവായ ആയത്തുല്ല അലി ഖമേനിയുടെ മകള്, മരുമകന്, ചെറുമകന് എന്നിവരും ആക്രമണത്തില് കൊല്ലപ്പെട്ടതായി റിപ്പോര്ട്ടുകളുണ്ട്.
ഇറാനില് യുഎസ് പിന്തുണയോടെ ഇസ്രയേല് നടത്തിയ ആക്രമണത്തില് 201 പേര് കൊല്ലപ്പെട്ടതായി റിപ്പോര്ട്ട്. 747 പേര്ക്ക് പരിക്കേറ്റു. ഇറാനിലെ ഹാര്മോസ്ഗനിലെ ഗേള്സ് സ്കൂളില് ഇസ്രയേല് നടത്തിയ ആക്രമണത്തില് വിദ്യാര്ത്ഥികള് ഉള്പ്പെടെ 108 പേര് കൊല്ലപ്പെട്ടു. അറുപതിലധികം പേര്ക്ക് ആക്രമണത്തില് പരിക്കേറ്റു. ഇറാനിലെ ജിംനേഷ്യത്തില് നടന്ന ഇസ്രയേല് ആക്രമണത്തില് പതിനഞ്ച് പേര് കൊല്ലപ്പെട്ടു. വിവിധ ഗള്ഫ് രാജ്യങ്ങളിലെ യുഎസ് വ്യോമതാവളം ലക്ഷ്യമിട്ട് ഇറാന് നടത്തിയ ആക്രമണത്തില് നാശനഷ്ടമുണ്ടായി. ബഹ്റൈന്, കുവൈത്ത്, അബുദാബി, ഖത്തര്, ദോഹ, ദുബായ് അടക്കമുള്ള ഇടങ്ങളില് ആക്രമണം നടന്നു.
‘ചരിത്രത്തിലെ ഏറ്റവും ക്രൂരരായ വ്യക്തികളില് ഒരാളായ ഖമേനി കൊല്ലപ്പെട്ടു. ഇത് ഇറാനിലെ ജനങ്ങള്ക്ക് മാത്രമല്ല, ഖമേനിയും രക്തദാഹികളായ ഗുണ്ടാസംഘവും കൊലപ്പെടുത്തുകയോ അംഗഭംഗം വരുത്തുകയോ ചെയ്ത എല്ലാ മഹത്തായ അമേരിക്കന് ജനതയ്ക്കും ലോകമെമ്പാടുമുള്ള മറ്റു രാജ്യങ്ങളിലെ ജനങ്ങള്ക്കും ലഭിച്ച നീതിയാണ്. ഞങ്ങളുടെ ഇന്റലിജന്സിനെയും അത്യന്താധുനിക ട്രാക്കിങ് സംവിധാനങ്ങളെയും മറികടക്കാന് ഖമേനിക്ക് കഴിഞ്ഞില്ല. ഇസ്രയേലുമായി ചേര്ന്ന് പ്രവര്ത്തിച്ചതിനാല് ഖമേനിക്കും ഒപ്പമുള്ളവര്ക്കും ഒന്നും ചെയ്യാന് കഴിഞ്ഞതുമില്ല. ഇറാനിലെ ജനങ്ങള്ക്ക് അവരുടെ രാജ്യം തിരിച്ചുപിടിക്കാനുള്ള ഏറ്റവും വലിയ അവസരമാണിത്. അവരുടെ റവല്യൂഷണറി ഗാര്ഡ്, സൈന്യം, മറ്റ് സുരക്ഷാ-പൊലീസ് സേനകളിലെ പലരും ഇനി പോരാടാന് ആഗ്രഹിക്കുന്നില്ലെന്നും ഞങ്ങളില് നിന്ന് കുറ്റവിമുക്തി തേടുകയാണെന്നും ഞങ്ങള് അറിയുന്നു. ഇന്നലെ പറഞ്ഞതുപോലെ, ”ഇപ്പോള് അവര്ക്ക് കുറ്റവിമുക്തി നേടാം, പിന്നീട് അവര്ക്ക് ലഭിക്കുന്നത് മരണം മാത്രമായിരിക്കും.” റവല്യൂഷണറി ഗാര്ഡും പൊലീസും ഇറാനിലെ രാജ്യസ്നേഹികളുമായി സമാധാനപരമായി ഒന്നിക്കുകയും, രാജ്യം അര്ഹിക്കുന്ന മഹത്വത്തിലേക്ക് തിരികെ കൊണ്ടുവരാന് ഒരുമിച്ച് പ്രവര്ത്തിക്കുകയും ചെയ്യുമെന്ന് പ്രതീക്ഷിക്കുന്നു. എങ്കിലും, പശ്ചിമേഷ്യയിലും ലോകമെമ്പാടും സമാധാനം എന്ന നമ്മുടെ ലക്ഷ്യം കൈവരിക്കുന്നതുവരെ, ശക്തവും കൃത്യവുമായ ബോംബാക്രമണം ഈ ആഴ്ചയിലുടനീളം അല്ലെങ്കില് ആവശ്യമുള്ളത്ര കാലം തടസ്സമില്ലാതെ തുടരും’ ട്രംപ് കുറിച്ചു.
അതിനിടെ ഇറാന് പരമോന്നത നേതാവ് ആയത്തുള്ള അലി ഖമനയി കൊല്ലപ്പെട്ടെന്ന അവകാശവാദവുമായി ഇസ്രയേല് പ്രധാനമന്ത്രി ബെഞ്ചമിന് നെതന്യാഹു രംഗത്തെത്തിയിരുന്നു . ഭരണകൂടത്തിനെതിരെ ഇറാന് ജനത തെരുവിലിറങ്ങണമെന്നും നെതന്യാഹു ആവശ്യപ്പെട്ടു. ജനങ്ങള് ഒരുമിക്കണം. അവസരം പാഴാക്കരുത്. ഇറാന് ഭരകൂടത്തെ താഴെയിറക്കണമെന്നും നെതന്യാഹു ആഹ്വാനം ചെയ്തു. ഖമനയി കൊല്ലപ്പെട്ടെന്ന അവകാശവാദവുമായി ഇസ്രയേലിലെ മുതിര്ന്ന ഉദ്യോഗസ്ഥനും രംഗത്തെത്തിയിരുന്നു . ഖമനയിയുടെ മൃതദേഹം കണ്ടെത്തിയെന്നായിരുന്നു ഉദ്യോഗസ്ഥന് പറഞ്ഞത്. എന്നാല് ഇറാന് ഈ വാദം തള്ളി. ഖമനയി സുരക്ഷിതനാണെന്ന് ഇറാന് വിദേശ്യകാര്യ വക്താവ് അറിയിച്ചിരുന്നു .
മലബാറി ന്യൂസ് വാട്സ്ആപ്പ് ഗ്രൂപ്പില് അംഗമാവാന് ഈ ലിങ്കില് ക്ലിക്ക് ചെയ്യു
